Ka SDO (C) ka Amlarem Sub-Division da pyntip ko wa da yoh ujor ko lyngba u Waheh Chnong ka Amlarem wa da em kiwa dai dukan, kiwa kamai kari wa kiwi dai tiar dai tar kamjooh ki bru paidbah wym bien ki wow pdiang ya ka poisa nar kawa T. 10 neidaw wa em i artatien wa em na ki toh ki poisa thok.
Neiliang ka SDO da pynche ko wa ka Reserve Bank of India (RBI) leh dadep ong ko wa kini ki poisa nar toh kiwa chna da ka sorkar India wei em ki jar jiar i rukom chon iwa da pynkylla neipor cheipor em kiwa pynyoo ya ka khayi pateiñ, ka imlang sahlang waka dustur riti iwa da wanrah wa da pynmih na ki por cha ki por. Wei neidaw wa kini ki poisa nar toh kiwa soi wei kiwa neh slem daw em ki boon jait kiwa pynemkaam ki bru heijooh i por tangwa kiwa da pynmih na uwi u snem cha uwi u snem.
Da kdaw leh wa em ki poisa nar wa em ya u chap ka Rupee katwa em won ki wym em booh ya uni u chap ka Rupee tangwa pynartylli toh kiwa krehkaam kaam hi ki poisa.
Kamtæ da em ki bru wym tip yeini da sdang ki wow pynartatien ya kiwi ki bru heiyatoh wa man paka kini ki poisa hadooh wa da thut ka yadai yathied wei da pynkulmar leh ya ki bru.
Neiliang ka Circular wa da pynmih da ka RBI da ong wa waroh ki poisa nar kiwa 50 Paise, ki T. 1, T. 2, T. 5, T. 10 wa T. 20 kiwa em i heh i khian wa boon jait kiwa em leh i rukom chon wa i dur wa boon jait toh kiwa krehkaam wei ym toh wow kyntait ya ki.
