U Montri Rangbah ka jylla da ong u wa i pynbna wow pyndam ya ka aiñ yakhle ym toh neidaw wa da jan ka Election, tangwa neidaw wa ka sorkar da ap ko yeiwa sñiaw yong ki paidbah.
Da khana u wa chwa wa u James P K Sangma u pynbna u yei rai yong ka sorkar da yaklam sani bha chwa wa oo kam u Montri Rangbah wei da pyntip u leh cha ki Montri ka sorkar, wei ini i rai toh hadien wa da bichaar bniah yei yaklam wa ki seiñ kiwa da pynsñiaw yei sñiewkhia hajrong ka aiñ yakhle.
Hajrong i ong wa i pyndam ya kani ka aiñ toh neidaw wa da jan ka Election, neiliang u Conrad da kyntait u deiwa ong wa ka sorkar ka sñiaw ko wa lada em i sñiawkhia na ki paidbah, kani ka sorkar hap ko wow ap yeitæ lada toh lane ym pu toh i por Election, wei pynrap u wa ini i rai da leh deiwa ap yei kwah yong ki paidbah wei hap wow pait biang ya kani ka aiñ.
U Montri Rangbah da ong u wa ya ka Meghalaya Regulation of Gaming Act, 2021 daw pyndam deiwa ka sorkar u wanrah ko da ka Ordinance ya kawa daw rah won ha Yung Dorbar Chna Aiñ yow yoh yei mynjur kamwa da leh ya kiwi ki aiñ.
Hawa kylli, da ong u wa ya katni ym em de kawon kawon ka aiñ wa kdoh wa khoom yei yakhle ha ka jylla, wei daw man kamwa jooh man wei ka sorkar daw pait ko kammon u leh neibynta ini.
Hawa kylli chooh chooh wow pyndam ya kiwi leh ki aiñ yong ki kaam yakhle kam ka sait tim, u Conrad da ong u wa ha iwi i liang em sakhiat kiwa boon ki kaam kiwa em jar jiar ki rukom pyrkhat, wei ha kiwa boon ki kaam ki em leh jar jiar ki rukom yathong, tangwa ka sorkar hap ko wow ap ya iyi wa ki paidbah pynsñiaw ki yei sñiawkhia.
