Hadien wa mih ki khubor wa ha rukom hajrong i chalan wei khayi tooh ya u mooyong khamtam nei dawa ka BJP-Meghalaya wow kem ya kiwa emkti ha i chalan tooh ya uni u mar poh khyndaw, ynne ka sngi won neiliang u Montri Rangbah ka jylla, u Conrad K Sangma da kyntait u yeini i pynbaad wa em i chalan tooh ya u mooyong cha baar ka jylla.
U Conrad da ong u wa ym em iwon iwon i chalan namo i kit, i khayi tooh ya u mooyong na ka jylla wei ini i pynbaad man i iwa khlem yurim waroh.
Da ong u leh wa ymtoh u pynbaad donhi du neidaw wa yoo ya ki truck kiwa lai ha sarokbah deiwa ong wa da pynlait du ya kiwa em ki kot ki sla kiwa biang.
Katkam wa ong u Conrad, da ong u wa ka sorkar da pynkhor ko wow dam u chah ya iwon iwon i chalan wei kit wei khayi tooh ya u mooyong deiwa krehlang ki chnat sorkar nadooh ka yung krehkaam ki Superintendent of Police, ki Deputy Commissioner ki sahep ka chnat Transport wa Mining Department.
Hajrong i dawa ka BJP wow phah takit ha ka CBI hajrong i khayi mooyong tooh, neiliang u Conrad da ong u wa ini ymtoh iwa miat wow phah takit hajrong kat iwa jia ha ka CBI, tangwa ka sorkar leh em ko jar jiar i bahkhlieh.
