Shillong: U Montri Rangbah ka jylla u Dr. Mukul Sangma da ong u wa i pynman ya ka Dorbar yong ka Yungdorbar chna aiñ ka jylla chong ko ha ka sorkar katkam wa emkaam.
Hawa yaklam wa kiwa pathai khubor ynne ka sngi u Dr. Mukul da ong u, “Phi ym emkaam u khuslai phi neibhah ka sorkar toh kawa skem wei ym em iwon iwon i yakhih”. Da ong u ya ini wa hadien wa kylli wa ym nood u khut dorbar neidaw wa daw chah pynkhih ka sorkar yong oo.
U Montri Rangbah da ong u leh wa ym sñiaw yahaap u wow pynman ya ka Election MLA wa ka Lok Sabha heijooh i por ha waroh ka ri kamwa da kwah ka sorkar pyrdi wa yahkhmat da ka BJP.
“Haap bichaar bha ya ki deiwa biang neibhah daw em i duna lada pynman election MP wa MLA ha i jooh i por”, da ong u Dr Mukul.
Da ong u leh wa lada leh ya ini daw haap pynkylla ya ki kyndon ka riti synchaar ka ri.
Chooh chooh da ong u wa lada em ka election chiteiñ samoi du ya ka MP Election waka MLA daw haap yang biang wow pynman ha i jooh i por.
Ka Election Commission of India hadien wa phah ka sorkar BJP wa lada ye mo wow pynman Election MLA wa MP ha i jooh i por da chong pyrkhat ko ya ini wei da ong ko wa emkaam 40 lak tylli ki kor EVM wa ki VVPAT wow leh ya ini kamjooh leh haap pynkylla ya ka riti synchaar ka ri.
Ya ka Election wa da booh tarik wow pynman ha ki le bnai wa sdang u snem 2018 da kynthup ki ya ka jylla Gujarat, Himachal Pradesh, Karnataka, Meghalaya, Mizoram, Nagaland wa ka Tripura lait noh ka Mizoram, heiwa kiwa sah ye u pynman Election du ha u Naikhynde donhi.
Discussion about this post