Ka MLA wa da chah Suspend yong ka seiñ Congress, ka M. Ampareen Lyngdoh da ong ko wa ym em yaphær lada ka Meghalaya Pradesh Congress Committee (MPCC) leh ko kammon kammon leh ya ki 5 ngut ki MLA. Da ong ko wa chong ha ka Congress wei ki toh u bood ki ya ki riti krehkaam (Constitution) yong ka Congress.
Ki 5 ngut ki MLA wa sah yong ka seiñ Congress ha ka 8 tarik u Thohlakhmi da lai e ki da ka chithi ha u Montri Rangbah ka jylla wow pynyoo yei kyrchaan wa pura deiwa lai yabi lang wa ka sorkar Meghalaya Democratic Alliance (MDA) wa yahkhmat da ka NPP kawa da emlang leh ka BJP najrong kiwi ki seiñ saiñpyrthai wa ki MLA khlem seiñ. Hajrong ini i leh ki MLA, neiliang ka MPCC lyngba ka All India Congress Committee (AICC) da Suspend noh ko ya ki.
Da ini i lai wow yabi ki 5 ngut ki MLA ka Congress, ka liang synchaar wa yahkhmat da ka NPP deilang wa ki MLA samen da em i boon paaid ki hadooh 48 ngut hapoh ka yung dorbar chna aiñ, katwa ka liang pyrchah da em ko 12 ngut ki MLA kiwa toh na ka seiñ All India Trinamool Congress.
Hawa kylli ynne ka sngi, ka Ampareen da ong ko wa ki 5 ngut ki MLA ym toh de kiwa chah pynlai ha ka Party, tangwa da rai ki wow lai cha ka liang kawa rap biang kawa rap bha neibynta i myntoi ka Party, wei lada ki yoo ki deiwa kamwi won, ki MLA ym ye ki wow pdiang ya iyi wa kiwa yahkhmat ka Party sñiaw ki. Da ong wa ini ym toh ka Parliament wei ym yahaap ko kamwa lai pynyabi lang wa ka NDA.
