U National Working President ka National People’s Youth Front (NPYF), u Nicky Nongkhlaw da khyrwait u ya ka All India Trinamool Congress (AITC), heiwa da ong wa kiwa yahkhmat ka AITC hachwa u kynreh ki ya ka yung ka sem yong uwon uwon toh u pait chwa ya ka yung ka sem yong idæ wa kammon man ko.
Ini i klam yong ka seiñ khynroo ka seiñ NPP toh wa hadien wa ka Trinamool Congress da pynmih ko yei pynbaad neipor cheipor ya ka sorkar MDA wa yahkhmat da ka NPP ha Meghalaya.
U Nongkhlaw da ong u wa kiwa yahkhmat ka TMC nadooh u General Secretary, u Abhishek Banerjee emkti ki ha ki kam thok poisa wei baamtooh ya u mooyong ha West Bengal, ka Partha Chatterjee ka emkti ko wow baamtooh hadooh T. 50 klur kawa toh ka poisa neibynta ka West Bengal School Service Commission wa kiwi ki kaam baamtooh, u Anubrata Mondal uwa da chah kem ha ka chnat CBI hajrong i chalan masi pyrchah aiñ cha Bangladesh, u Vinay Mishra uwa emkti ha ki kaam thok poisa wei uwa dang chah kynreh ha ka chnat Enforcement Directorate wa ha ka CBI wa u Manik Bhattacharya uwa emkti baamtooh hei kaam thung sikai ha ka jylla West Bengal.
Heijooh i por uwa yahkhmat ka NPYF da ther u ya kiwa yahkhmat ka AITC kiwa da lai wow yakhih ha Delhi dang ini wa dep yow dawa pynpsiah ya ka ktien Khasi wa Garo hapoh ka Eight Schedule, tangwa ym em won klam yow pynyoh ya ka Inner Line Permit ha Meghalaya. Da ong u wa ini i wym rah yong ka Trinamool Congress ya ka phang ILP toh wa ka Mamata Banerjee da ong ko wa ya ki nong Bangladesh kiwa em ha West Bengal toh u tipmit kam ki nong India.
U Nick da ong u wa ye u man wa da em wa phah ya kiwa yahkhmat ka Meghalaya TMC wym toh u rah ya kani ka phang ILP ha Delhi, neibhah daw ktah ko ya ka Vote Bank ka yong ki.
