Jowai: Ki san ngut kiwa chong bichaar ka Supreme Court ka ri wa khlieh da u Chief Justice ka ri u Dipak Mishra ynne ka sngi da pynmih hukum ki wa ka sorkar ymye ko u pynbor yei pynemkaam ya u Aadhaar kat wympu dep u bichaar bniah yei ktah u yei hok samen ki paidbah.
Kamtæ da pyndam ya ka tarik wa booh khaddooh ha kani ka 31 tarik wow pynyabi ya u Aadhaar nadooh ki Bank Account, Mobile Phone wa ki Passport wei ym em de booh ya ka tarik wa khaddooh wow leh ya ini.
Ka Supreme Court da leh ko ya ini neidaw wa sñiaw ko wa da tyngkheiñ ko yei hok samen ki bru wym ye u pynbor ya ki u leh ya iwa ymtoh i mon yong ki tangwa pdiang hi ko wow pynemkaam ya u Aadhaar wow pynemkaam ha ki Scheme sorkar kam ha ki saam khoo rachon, chini wa kiwi ki Subsidy wa e ka sorkar tangwa kattæ leh daw chong bichaar biang hei yatoh wa ini waroh.
Ha u Duyatra (January) da mih leh ka hukum naka sorkar ka ri wa emkaam leh ya u Aadhaar heipor wa pynthymme ya ka Passport kamjooh heipor wa yaleh ya ka Passport thymme hapoh ka Tatkal Scheme kawa da yaleh pyrchah uwa kreh mon sñiawbha u Vrinda Grover.
Ha ka 15 tarik u Kmaichonglaad (Dec) ka Supreme Court da pynyinsur ko ya ka tarik wa khaddooh cha 31 tarik Wisu (March) wow pynyabi ya u Aadhaar hei yatoh wa kiwa boon ki Scheme sorkar wa yarap ya kiwa dooh wa duk.
Tangwa kiwa yaleh mukotduma pyrchaah ya ini da ong ki wa waroh ini wa leh ka Unique Identification Authority of India (UIDAI) wow emkaam Aadhaar Number wa ki Bank Account ki Mobile Number man i iwa be-aiñ wei pyrchah ko leh ya ka riti synchaar ka ri.
Discussion about this post