U Montri wa pait ya ki kaam uiñke suwari, u Paul Lyngoh da kyntu u ya kitu kiwa pyrchah ya ka Meghalaya Economics & Investment Promotion Policy (MEIPP) wow e yumut lang ki cha ka sorkar hajrong ka rai wow thied wei pynlang thaw (Land Bank) neibynta ki kaam pynroi.
Ini da ong u wa hajrong i chah kynthah wei pyrchah hajrong i rai yong ka sorkar wow pynkylla ya ka Meghalaya State Investment Promotion Facilitation Act, kawa thmu wow e bor ya ka Investment Meghalaya Agency (IMA) wow thied thaw yow e pateiñ yei thaw cha ki Company wa kiwa seiñ kaam.
“Suk wow ong wa kani ka kaam man ko ka wym toh. Lada sñiaw ki wa ka Policy wa da wanrah da ka sorkar u man ka wym toh, toh wow e yumut da kawi won kawa rap bha wa ka sorkar u leh ko”, da ong u.
Hawa kdaw wa iwon iwon ymtoh wow kut du wow pyrchah, u Montri da kyntu u ya kiwa pyrchah wow wan ki chakhmat yow pynyoo yei e yumut deiwa e dei thoh kawa rap bha bar ya iyi wa ka sorkar da rai ko.
Da ong u wa ka MEIPP toh ka Policy kawa da pdiang wei mynjur da ka Yung Dorbar Chna Aiñ ka jylla, wei i pynkha ya ki ‘Land Bank’ neibynta ki kaam pynroi toh kawa da mih lyngba kani ka Policy.
“Lada emkaam wow pynjanai bha ya ka Policy, nga sñiaw O wa toh kawa ye wow leh ha iwon iwon i por neibhah nga ngait O yeiwa ong wa i thaw boon bha ko ha kani ka pyrthai wa toh u ye wow pynjanai”, da ong u Paul uwa man leh uwa e ktien ka sorkar MDA-II.
Hajrong i tyrwa wa emkaam wow yasyllok wa ki liang waphær waphær, u Montri da ong u wa kani ye ko wow yarap, neibhah wym em iwon iwon iwa ye u rai kut bait wot ka Riti Synshaar yong ka ri, kawa da kheiñ kam kawa jrong tam ha ka pyrthai, tangwa da pynkylla thymme da palat 100 sien.
“Kamtæ ym em kam itæ iwa da rai kut ha ka synchaar khadar. Na itæ i daw hawa kyruiñ cha ka kaam chan aiñ, ym jooh em utæ u ‘Full Stop’, da em bait du ki ‘Coma’,” da ong chooh chooh u.
Hawa kylli wa manda su yei thaw wa lada man ko i knieh noh ya u khyndaw u chyiap ki tre chnong, u Paul da ong u wa lada puræ ya ka MEIPP, da em ki bynta kiwa yatoh wa ka ‘Green Economy’, i bhah kaam ya ki khynroo tre chnong, tangwa wow ong bait wa em i knieh noh yei hok i khyndaw chyiap, ym man kawa toh.
“I thmu heini toh wa ka sorkar u man ko ka tre i thaw wei yei thaw u e wai cha ki Company waphær waphær. Hawa ong i Company, nga sñiaw O wa da toh i por wa ki bru yong i u ya ksohktilang kam ka kynhun wow sdang da ki Company. Heiwon em i eh wow leh yeitæ?” da ong u Montri.
U Paul Lyngdoh da ong u wa ka New Shillong Township toh ka Agency, ka MIDC, MTDC ki thied thaw ki tangwa i thaw man ko i yong ka sorkar hi.
Hawa e nongmuna chooh chooh, u Paul da ong u wa ki Project ka chnat Tourism, ka sorkar da e wai ko cha kiwa seiñ kaam lada ha Sohra næ ya ka Polo Orchid.
“I pyrkhat wa daw dooh noh yei hok ya i khyndaw u chyiap ym mih de i,” da ong u.
Discussion about this post