U Phasmon Dkhar, MDC ka Musniang-Rngad uwa man leh kam uwa e ktien ka JHADC da yada u yei pynman dorbar ka Council ha ka 11 tarik uni u bnai deiwa ong wa da leh ya kani katkam ki kyndon ka aiñ.
Da ong u wa nyngkong da mut wow pynman ha ka 14 tarik uni u bnai tangwa neidaw wa haap ko ha ka sngi Behdieñkhlam, kamtæ da rah tarik cha ka 11 tarik tangwa kani ka sngi da toh ryngkat wa haap ko ha ka sngi wa sdang ka Behdieñkhlam ka Raij Jowai wei ym chah ka aiñ wow rah tarik chwa ka 11 tarik wei da hap bait wow pynman ya ka dorbar khlem pynslem de.
Heiyatoh wym yoh chuti ki wakreh ka Council, u Phasmon da ong u wa da em ka sngi chuti wa da e da ka jylla.
Da pynche chooh chooh u wa ki wakreh ka Council toh kiwa bood ya kiwa boon ki jait niam wei kitu kiwa man kam ki khon ka Niamtre ye ki wow chim da ka Casual Leave wei ym em khang ya ki wow leh yeini.
Da kdaw u leh wa ym ye wow e ware chiboon ki chuti neidaw wa ka khlam COVID-19 da ktah chwa ko yei kaam i jaam, ki kaam pynroi neibynta ki paidbah wei da sah boon ki kaam, kamtæ da hap wow pyndep ya ini wa da sahdien wei da em chwa leh boon ki chuti ha ka chi snem.
Da ong u leh wa ki MDC leh toh kiwa bood ya kiwa boon ki niam wei da burom yeini deiwa lai leh burom lang wa ki ha ki yung ki sem yong ki.
“Nga kam u Christan leh chimbynta O wow lai hiar cha ka Syiem Aitnar,” da ong u Phasmon.
Hajrong ini da ong u wa ki kyntien wa da mih na u bru wa emburom kam u President ka Seiñraij Jowai toh i wym ye u pdiang da ka Council yei wym chah ya ki MDC wow wan lehkmen Behdieñkhlam.
“Iyi man u wow khang ya i wow lai lehburom, lehkmen ya ka Behdieñkhlam, toh u paan maap u naka Council,” pynkut u Phasmon.
Puræ leh: Nei sñiawthooh bakla tæ pynman ka JHADC ya ka Dorbar La’yur ynne ka sngi: Dr. Sankey
