U Montri ka chnat bordiñ u James Sangma da ong u wa ym ye wow maap yaka bai bordiñ kawa toh neibynta i por wa em ka Lockdown neidaw wa daw ktah ko leh yaka MeECL kawa hap ko wow su tulop ya ki wakreh wa kiwi kiwi kiwa daw hap ko wow su.
Ya ini da ong u hawa e yei jubab hapoh ka dorbar wa yatoh wa i ku ka bai bordiñ wei hawa kylli u MLA ka Mawlai u Process T. Sawkmie wa lada ka sorkar daw maap ko yaka bai bordiñ kawa toh neibynta i por Lockdown.
U James da pyntip u leh wa ka bai bordiñ heipor ka Lockdown toh kawa da kheiñ antaad deiwa chim yukheiñ lang yong ki bnai wa da dep neidaw wa kiwa lai chim yaka Meter Reading ym yoh ki wow lai pait dei khmat neidaw wa em ka Lockdown wei kani ka rukom kheiñ bai bordiñ deiwa kheiñ kamni toh kawa da myllien kamni da slem.
Neiliang u MLA ka Umroi u George Lyngdoh da ong u wa kammon wow tip yaka bordiñ hawa kiwa boon ki Meter toh kiwa ym krehkaam kamtæ da phah su hi-eh yaka bai bordiñ deiwa antaad hi-eh kawa em ki por toh kawa heh dor.
Hajrong ini, u James da ong u wa ka sorkar daw sdang noh ko wow pynemkaam da ki Smart Meter ha waroh kawi ka jylla yow lait noh wow thut ka rukom kheiñ bai bordiñ wei ki paidbah leh daw pyntip cha ki yaka bai bordiñ lyngba ki SMS lane WhatsApp wei kini ki Smart Meter leh daw pyndooh noh ko yei emkaam wow booh ya kiwa lai leh yaka Meter Reading.
Heiyatoh wa i ku ka bai bordiñ, u George da ong u leh wa oo da maad u ya ini pyn ha yung u heiwa da poi ko hadooh T. 12,000 iwa da chimpor hadooh 5 bnai wow pynbait.
Neiliang won u MLA ka Nongthymmai u Charles Pyngrope da ong u wa toh u e laad yaki bru kiwa chah ah i bordiñ wow su yaka bai bordiñ kajiak chisien bar yow ah chisien ah, heiwa u Montri da jubab u wa ka sorkar da sdang ko yaka Scheme wow maap yaka kuna wa hap su manda slem wow su bai bordiñ namo ka Delayed Payment Charges.
Da yaklam leh yei booh kyndon ka MeECL ya ki chnong wow hap su ki 30% ka bai bordiñ ki wei lada ym leh ya ini ym pynchna de ya u Transformer wa sih heiwa u James da ong u wa daw pyrkhat biang ya ini.
U MLA ka Gambegre u Saleng A. Sangma da wanrah u yaka phang wa em ki chnong wa hapoh ka Constituency yong oo kiwa ym jooh em yoh yei pyndait bordiñ tangwa poi bait ka bai bordiñ cha ki hadooh katni.
Ya ini neiliang u James da kular u wow chimkhia.
