Ka MLA na East Shillong, ka Dr. M Ampareen Lyngdoh da pynsñiaw ko yei wym yahaap ya i rai wow phah puræ Hindi hadooh Class IX ha ka jylla, deiwa ong leh wa ymye wow pynman kongsan ya ka ktien Hindi ha Meghalaya kawa em ya ki ktien tynre wa da tipmit hapoh ka Sixth Schedule.
Da ong ko wa ka ri India toh kawa synchaar paidbah, heiwa da pynkupbor ya ki sorkar jylla wow chim rai, wei lada em i yaklam wa i mynjur da ki jylla ka thaaiñ mihnsgi wow pynemkaam ya ka ktien Hindi ha Meghalaya, hap kylli leh ya ka sorkar India kammon wow leh ya ki ktien tynre neibhah ym em ki jylla wow chah ya ka sorkar India wow chim ya kam kani ka rai.
Chooh chooh da ong ko wa ymtip ya i daw wa pynman ya ka sorkar India wow chim ya kani ka rai, tangwa ymye won ko wow mynjur namo wow phah pynemkaam ya ka ktien Hindi ha Meghalaya kawa da em chwa ya ki ktien wa da tipmit hapoh ka Sixth Schedule, kitæ toh ki ktien Khasi, Jaiñtia wa Garo kawa man ka bor kawa khlan bha, wei toh u pyntikna wa ini i thmu ka sorkar India ym krehkaam i ha kani ka jylla.
Kam wow kdaw heini, ynnin ka sngi, u Montri ki Kaam Pohyung ka ri India, u Amit Shah uwa khlieh ya ka ‘Parliamentary Official Language Committee’ da ong u wa toh u esikai ya ka ktien Hindi hadooh Class IX wei da mynjur ki 8 jylla ka thaaiñ mihsngi wow sikai ya ka Hindi hadooh Class X.
Puræ leh: Waroh 8 tylli ki jylla ka North East da mynjur wow sikai Hindi hadooh Class X: Amit Shah
