Shillong: U Montri wa pait ya ka chnat Bordiñ (Power) ha ka jylla, u James Sangma da ong u wa i mih paidbah ha ka Meghalaya Energy Corporation Limited (MeECL) ym ye wow pynbait noh kattæ hi-wot, wei ki eh wa yachem da ka MeECL toh iwa da pynlang nadooh ki snem wa nachwa wei ym toh iwa dang ha kini ki kajiak sngi.
Da ong u wa ym toh iwa suk wow pynbait wut wut yei eh wa ka MeECL da maad ko, tangwa hanla kattæ leh, neiliang ka sorkar jylla da pyrchang ko khlem chong ngiah wow thooh ki laad ki luti. Da ong u leh wa iwi i eh wa ka MeECL da chem ko toh i dooh nong ha ka Aggregate Technical & Commercial (AT&C), deiwa pynrap leh wa lada ka sorkar ye ko wow pynlait na ini i dooh nong, daw em i ku ha waroh ki liang ha ka MeECL.
U James da ong u wa katni neiliang ka sorkar da chim hi ko ya i kitkhlieh wow yarap ya ka MeECL deiwa pynbha yei rukom saam bordiñ, wow booh da ki Sub-Station wa thymme, ki Transformer wa paka wa kiwi ki laad.
Da ong wa kani ka luti wa da chim da ka chnat daw yarap ko wow pynduna yei dooh nong na ka AT&C, i wow wanrah won ya i ku ha i kamai ka MeECL, wei hadien ini daw ye leh wow pynbait ya kiwi ki eh wa ka MeECL yachem ko, la ha i su ya ka tulop cha ki wakreh wa kiwi kiwi.
Hajrong i pynbaad uwa yahkhmat ka Congress, u Dr. Mukul Sangma wa ya ka MeECL da pynemkaam hi-eh kam ka thaw khem dud ka sorkar, u Montri da ong u wa kam kini ki pynbaad man ki kiwa pynlynngoh neibhah wa ka sorkar da pyrchang ko ya ki laad ki luti wow pynbha ha kini ki kajiak bnai wa da dep, tangwa ka liang pyrchah da thooh daw ko du wow yoh nong i saiñpyrthai.
Da ong u leh wa kam kini ki pynbaad toh du wow pynlut por suda.
