U Montri Rangbah ka jylla Assam, u Himanta Biswa Sarma da ong u wa ka Liang Pyrchah hapoh Assam leh dawa ki wow paitbniah biang ya ka soskular sñiawthooh yumut namo ka Memorandum of Understanding (MoU), tangwa da ong u wa dadep wow jubab hapoh ka yung dorbar chna aiñ ka Assam wa waroh ki thaw toh kiwa em hapoh India, wei kam chi payu dadep soi leh ya ka mynjur hawa yatoh wa ki 6 tytlli ki thaw wa ya kajia wa ka Meghalaya wei ym toh de wow wai biang ya kani ka phang.
Da ong u wa ym ye wow pynkmen bait ha ki soskular namo i ya sñiawthooh, deiwa ong wa em bait ki bru ki wym sñiawsuk, tangwa ka ri ka sñiawsuk ko. U Montri Rangbah ka Assam da kyntait u wow ong iyi wa da pynbaad ka Liang Pyrchah ha Meghalaya neibhah toh i kaamram u Montri Rangbah ka Meghalaya wow chim ya i yaroh lane i chah pynbaad wei hawa yatoh wa ka Assam da ong u wa ka sorkar dadep ko wow jubab hapoh ka yung dorbar.
Ha iwi i liang, u Himanta da ong u wa ha u Naiynru lane ha u Naiynñiaw uni u snem daw sdang wow pynbait noh leh ya ki 6 tylli kiwi ki thaw wa ya kajia, wei na kini kamwa 3-4 tylli toh kiwa chitom bha wow ya pynbait wei heiwon i dur u kut daw man kawa eh u ong.
Da ong u wa ka bynta kawa ar man ko kawa kyllaiñ bha neibhah wa em ya ka Langpih, ka Block I, Block II deiwa pynrap wa waroh ar jylla, ki sorkar wa ki paidbah ki yaklam ki ymtoh ya ka ya kynaad tangwa ki laad wow pynbait yei eh.
