Ka seiñ JSU-Southern Border Zone, East Jaiñtia Hills da yachem ko wa u Symbood Montri Rangbah, u Prestone Tynsong yow dawa wow pynyabi ya sarok 4-Lane uwa tip leh kam u High-Speed Corridor wa u sarok Rymbai-Bataw-Borghat-Jalalpur Road ha ki bynta ka thaaiñ Bataw.
Uni u sarok toh uwa jrong 166.8 Km heiwa 144.8 Km u em u hapoh Meghalaya katwa 22 Km won hapoh Assam.
Ka seiñ da ong ko wa katkam wa man kattæ uni u sarok daw yabi u ha Ladrymbai wa Umsatai tangwa kiwi ki chnong ym poi uni u sarok 4-Lane iwa daw man i dooh nong ya ki neibhah daw hap ki wow pynemkaam da u sarok warim.
Ini daw ktah ko leh wow lai cha ki yaaw ki haat kiwa daw mih thymme neibhah daw hap wow thooh da ki luti wa thymme iwa man leh i dooh nong hadooh kattæ kattæ nei wym yoh u wai ya ki dukan dukdoh wa kiwi ki jait khih.
Ki chnong ki wym yoh myntoi daw man ki kam kiwa chah ieh mylliñ, kamtæ da emkaam wow pyntikna wa ki chnong wa em ha ka thaaiñ Bataw kam ka Pynurkba, Bataw, Umlangsha, Lakadong, Borghat wa Kwator u yoh myntoi ki deiwa em uni u sarok.
Da ong wa deiwa ye u pynyabi ya u sarok RBBJ daw pynjan ko ya kiwa chong chnong ka thaaiñ Bataw cha uni u sarok High-Speed Corridor wei deiwa leh kamni daw yarap ko leh yei kit i bah ya ki mar rep kamjooh i pynpoi ya kiwi ki jait mar cha kini ki chnong.
Kamtæ da ong wa daw yoh myntoi bha na uni u sarok lada yabi u wa kiwi ki sarok chnong.
Neiliang u Prestone da ong u wa daw pait wei u chimkhia u yeini lada ye wow leh kamwa da dawa ka seiñ.
Discussion about this post