U Baitlang Pohsngap da tyrwa u cha ki paidbah ka Jowai South wow yakhun u ya ka Election MDC cha ka Jaiñtia Hills Autonomous District Council (JHADC) kam u kyrtong khlem seiñ hadien wym yoh Ticket u na ka Voice of the People Party (VPP).
Hawa klam cha ki laad pathai khubor ha Shillong Press Club ynne, da ong u wa lada ki paidbah e ki yei kyrchaan ya oo, daw yakhun u ya ka Election kam u kyrtong khlem seiñ.
Da khana u wa nadooh u snem 2009 da yakhun u ya ka Election MDC tangwa khlem poi cha ka thong, wei ha kani ka kynti leh da pyrkhat u wow yakhun biang ya ka Election MDC heiwa da psiah u leh cha ka VPP wow paan leh ya ka Ticket da ka yurim wow wanrah ya ka saiñ hima-sima kawa khooid. Tangwa ym yoh Ticket u na ka VPP.
Da khana u leh wa da booh u yei tyrwa neibynta wow paan Ticket na u Secretary ka Election Committee yong ka VPP wei kamjooh na u President ka VPP.
U Baitlang da kylli u leh wa ka VPP da paan yumut ko namo ym em na ki paidbah hachwa wow e Ticket ha Jowai South, neibhah ym em ko ya ka Unit næ ka Circle ha katai ka Constituency.
Discussion about this post