Hawa sñiawkhia hajrong i maham ka AICC wow pynchitom ya ki san ngut ki MLA kiwa da lai chakhmat wow lai e kyrchaan pura ya ka sorkar MDA wa da yahkhmat da ka NPP khlem da yoh bor chwa na ka AICC, neiliang kawa yahkhmat ka Congress Legislature Party (CLP) ka Ampareen Lyngdoh da ong ko wa ka AICC ym ye ko wow hukum hi-eh lane wow pynlai ya ki san ngut ki MLA.
“I ym toh kiwa mihkhmat kiwa chah yah hi-eh cheiwon cheiwon. Du i ki 5 ngut kiwa dang em hapoh ka seiñ ha kam ini i por,” da ong ka Ampareen hawa klam wa uwa thoh khubor ynnin ka sngi.
Da ong ko man-i-por da toh bait ka AICC kawa chah pynbaad neibynta kam kini ki kaam tngit kiwa da wan jia hapoh ka seiñ.
“Kamtæ daw man pyrchah ya ka yurim yong ka seiñ lada ki chim ki da ka laad pynchitom pyrchah ya i. I kwah i wow lai bait ha i mon yong i wow chim ya ka rai,” da ong ka Ampareen.
Hawa yatoh wa i klam yong u President ka MPCC u Vincent H Pala, ka Ampareen da ong ko wa ym em yumut ware iyi wa ong uwi u bru.
Kam wow pynkynmoo wa ki 5 ngut ki MLA da yachem nyngkong ki ya u Montri Rangbah ka jylla u Conrad K Sangma ha ka 22-01-22 wow e yei kyrchaan ya ka sorkar MDA hajrong ki kattu katni ki phang.
“Kamtæ i yukylli wa mih heini toh ileh wym em i yaklam lane i e chithi cha ki MLA ka seiñ, wa ym toh u lai ki chakhmat lada em ki iwon iwon i eh næ pyrchah ya i thmu yong i. Toh iwa biang lada ka MPCC wa AICC u thoh ki cha i wa ym mynjur ya ini i rai yong ngi,” da ong ka Ampareen.
Hawa pynsñiaw wa man sakhiat wa eh neibynta ki MLA wow yachem wa kiwa yahkhmat ka AICC, ka Ampareen da ong ko wa man i wym ye u pdiang wa hap ki wow yang yei e bor yong kiwa haneiñ; hajrong ki kaam kiwa yatoh bait thij neibynta i bha i biang yong ka jylla.
“Kamtæ katni chong i ha ka MPCC. I man i kiwa smat wow yatai hajrong ini,” da ong ko.
“I kwah i wow pyntikna wa ym yut næ ieh ya ka seiñ tangwa ym ye won phi neini chakhmat wow kdoh u khoom ya i. Toh u ap ya i neibhah ini daw bha neibynta ka seiñ hapoh ka jylla, lym kamtæ leh ya iyi wa kwah phi, neibhah wa i ymtoh kiwa pynlai ya ka seiñ mon sñiawbha tangwa i em i yei kitkhlieh neibynta ki paidbah kiwa da jied ya i,” da ong ko Ampareen.
