Jowai : Ka Office u Deputy Commissioner ka West Jaiñtia Hills ha ka chithi wa da thoh cha ka Jaiñtia Tourism & Environment Society da pynsñiaw u yei wym hun mysien u yei rukom pyllai ya ka 10th Discover Jaiñtia 2016 da kani ka seiñ.
Neiliang ka Office u DC da pyntip wa nadooh wa sdang kani ka Discover Jaiñtia u bahkhlieh ko du ya ka poisa (sponsor) donhi wei ym pynwit ko næ u pyllai ko ya ki program wa boonjait.
Da e nongmuna u DC wa ya ka yalang ha Nan Thadlaskeiñ heiwa da kular ka JTES wow wan da ki hajar ngut ki bru, tangwa chiteiñ na kiwa em toh du kiwa kreh sorkar kiwa da hukum wa toh u em ki ha kani ka sngi khlem pep.
Ha kani ka jooh ka sngi u DC da ong u wa u President ka JTES da wan slem u kamwa 10 minit hadien wa da wan poi u kongsan ha kani ka sngi u Dr. RC Laloo wei da haap phet ki sahep (officer) na Office u DC yow lai bait ka program yow lait nei jahburom.
Ini i duna i rukom pyllai ya kani ka Discover Jaiñtia da poi i chadooh ki chkoor ki heh yong ka tnat Tourism.
Kamtæ ka sorkar khamtam ka tnat Tourism ymbien de ki u emlang wa ka JTES heiwow pynman ya ka Discover Jaiñtia ha kini ki snem wow wan.
Heijooh i por ki bor District da slem bha da pynsñiaw ki cha ka JTES yei wym em u sñiawhun ki yei rukom pyllai ya ki kaam pynwyrngia kam ki Cultural Program.
Hei yatoh wa ka poisa u DC da ban joor u wa ym em kular u wow e hadooh T. 11 lak neibynta u pynman ya ka Discover Jaiñtia ha ka yalang wa da pynman hapyrdi ka JTES wa ki bor District. U DC da ong chooh chooh u wa lada em sabut ki ya ka rai yong kani ka yalang kawa da soi da ki pyn-ar liang toh u wanrah ki ya ka rai cha u DC.
U DC da pyntip u leh wa neiliang ka District Administration da pyllait ki waroh T. 7.25 lak ha ki ar bynta wa nyngkong T. 5 lak lyngba ka Cheque No. 074880 ha ka 9 Thohlakhmi 2016 katwa kawa ar won T. 2.25 lak yow pyllai ya ki Cultural Program lyngba ka Cheque No. 074881 ha ka 23 Thohlakhmi 2016.
Kamjooh leh neiliang ka Office u DC da ong ko wa ka JTES leh emkaam u khrong poisa ko na ki bru samen, ki seiñ, ki Company wa kiwi kiwi yow pyndap poisa yow laibait ka Discover Jaiñtia.
Ka Office u DC leh da kular ko wow thooh poisa yow paan poisa ko na ka that Tourism Department tangwa neiliang kani ka tnat da e ko du T. 2 lak donhi wei hadooh katni dang yang ki yow yoh ya kani ka poisa.
Manda yoh ya kani ka poisa na ka Tnat Tourism daw poi ka poisa waroh T. 9.25 lak. Ka poisa kawa sah na kani ka wow su cha kiwa em bynta ha ka Discover Jaiñtia 2016 toh u bahkhlieh ka JTES pyn naka hi.
Kani toh katkam ka chithi wa phah u DC ka WJH cha u President ka JTES kawa da yoh copy u WYRTA.
Read Also: Yakdaw kti ka JTES wa ka Office u DC, WJH heiyatoh waka Discover Jaiñtia
Discussion about this post