U Montri Rangbah ka Jylla u Conrad K Sangma da ong u wa i haap i oor ha kylleiñ ki chnong ka jylla ha ki tayaaw wa dadep da man iwa ympoi pyrkhat wei iwa ymye u batai, la ha i chlai um, i oor khyndaw, ki sarok wa kiwi kiwi.
Da ong u wa i chah ktah da man iwa chyrkhei wei iwa ymye wow pyrkhat, heiyatoh wa i chlai um ka Wah Simsang du hapoh 3 kynta da ku ka um da ki 30 næ 40 phut, wei hawa pait ya ki bynta u sarok leh ymye de wow ngait neibhah wa da tymmoh lut da ki moo kiwa heh ha waroh ki bynta iwa da ktah yei lai i wan ki paidbah.
Chooh chooh da ong u wa ha ini i chah ktah, ki chnat da leh ki yeiwa emkaam wow pynbiang ya waroh nadooh wow pynpoi bordiñ, i e yarap wa jhan, wow pynpoi ya ki mar baam khamtam lyngba ki ‘Helicopter’ ki chipai suiñ wa neiliang ki BSF wei da ekhublei u ya ki chipai suiñ kamjooh ki BSF wa kiwi kiwa da wan chaphrang wow e yarap iwa jhan cha kiwa chah ktah.
Da ong u wa hanla i dooh bordiñ da jia i ha kiwa boon ki chnong nei haap ki dieñ ki siej wa i oor khyndaw tangwa neiliang ka chnat wa toh u pait yeini da ye ko wow leh yeiwa emkaam, wei daw chimpor du wow chna ya ki sarok kiwa da oor ha kiwa boon ki chnong heiwa da tkut ki sarok na waroh ar liang iwa da booh hei eh wa khroo ya ki pooh chi-loom næ ki JCB wow yoh u pynkhooid wei hanla kattæ leh ki chnat da kreh chitom ki wow pynbiang ya kini ki sarok.
Ha iwi i liang da ong u wa hawa sdang wa wan i chah ktah nei joor u slap, heipor wa lai u cha Delhi da yachem u ya u montri ki kaam pohyung ka sorkar India u Amit Shah wei hadien wa pynsñiaw yeiwa chah ktah da paan yarap poisa iwa kynjoh T. 300 klur.
U Conrad da ong u wa ini i paan yarap wa T. 300 klur hakhmat u Montri ka Sorkar India, toh hadien wa chim yukheiñ wut-wut heipor wa sdang u slap dang hapoh ki 24 kynta donhi wei ymtoh ka yukheiñ wa yoh waroh kamwa man katni. Da pyntip u leh wa neiliang u Amit Shah da phah u wow em i sylli na waroh ar liang, itæ na ka sorkar India wa ka sorkar jylla wow chim yukheiñ hajrong i chah ktah waroh.
Da ong u wa ka T. 300 klur ympu dap ko tangwa emkaam rap boon wei ymye wow ong hadooh katwon neibhah ympu yoh lut ya ki yukheiñ waroh, deiwa pynrap wa i tyrwa ka sorkar jylla iwa T. 300 klur hakhmat ka sorkar India toh iwa da dooh dang hapoh ki 24 kynta nadooh wa sdang u slap wa joor.