Ka chnat Veterinary and Animal Husbandry yong ka jylla Meghalaya da thoh ko cha ka sorkar Assam hajrong i chah ktah na ka Assam Cattle Preservation Bill. Ya ini da pyntip da u Montri ka chnat, u Sanbor Shullai ynne ka sngi hapoh ka Yung Dorbar.
Hawa jubab yeiwa kylli u Adelbert Nongrum, u Montri da ong u wa ka aiñ yada masi da ktah ko ya ka jylla Meghalaya, wei da pyntip u leh wa hadooh katni ympu e ya ka Transit Pass ya kiwon kiwon kiwa khayi masi ka jylla, tangwa ka chnat daw e noh ko ya ka khnang wow pynsuk ya kiwa khayi na ka jylla.
Hajrong i ku dor i doh masi, u Sanbor da ong u wa ka chnat da yoh yutip ko wa kiwa khayi da pynku dor ki ya i doh masi, tangwa hadooh katni ympu em i thmu na ka sorkar wow booh dor ya i doh masi.
Da ong u wa ka chnat da pynkrehkaam ko leh ya boon tylli ki Scheme wow pynchlur ya ki kaam psan masi ha ka jylla wei da pynkreh leh boon ki Scheme ya kiwa da phah cha ka sorkar pyrdi hajrong wow psan masi.
Heiyatoh won wa i chalan ya ki masi cha Bangladesh, iwa man i daw wa ku i dor i doh masi ha ka jylla, u Sanbor da ong u wa dadep yaklam wa ki sahep kamjooh ki chipai ka BSF wow krehlang neibynta wow yada na i khayi tooh ya ki masi cha Bangladesh.
