15 49.0138 8.38624 1 0 4000 1 https://wyrta.com 300 0
Advertisement ad1

Ymtip ka sorkar Meghalaya wa phah poisa ka Punjab cha ki bru ha Them Iewmawlong

0 Comments
Advertisement ad1
Advertisement ad1

Shillong: U Montri ka chnat pynroi sor, u Hamletson Dohling da pyntip u ha ka dorbar wa i e poisa ka sorkar na Punjab cha ki bru ha Sweeper’s Lane Them Iewmawlong toh nadooh u snem 2015 wei itæ leh khlem tip ka sorkar Meghalaya, tangwa da e lyngba ka yung krehkaam u Deputy Commissioner ka East Khasi Hills.

Hawa jubab yeiwa kylli u dkhot ka liang pyrchah u Process T Sawkmie uwa man leh u MLA ka Mawlai, neiliang u Hamlet da pynsñiaw u leh yei phylla hajrong ini i rukom phah yarap ka sorkar Punjap khlem pyntip cha ka sorkar jylla. Da ong u wa ym em iwon iwon i thoh i taar wa da yaklam hapyrdi ka sorkar Punjab wa ka sorkar na Meghalaya hajrong kam kini i e yarap.

U Hamlet da pyntip u wa ha ka 18 Naisan 2015 ka sorkar Punjab lyngba ka Chief Minister’s Relief Fund da e yarap ko T. 1.50 Lak cha ki 10 ngut ki kynthai wa da yap kurim kiwa sah ha Them Iewmawlong, wei da yabhah ya kani ka poisa mar T.15 hajar hapyrdi kini ki 10 ngut.

U Montri da pyntip chooh chooh u wa ha u snem 2016 ka sorkar Punjab da phah poisa ko T. 10 Lak neibynta wow chna ya ka skur Guru Nanak kawa em ha kani ka thaw.  Da pynrap u leh wa kani ka kaam man ko kawa dadep wei ya ka Utilisation Certificate (UC) leh da dep phah nadooh ka 31 Naiynñiaw 2017.

Hajrong i e yarap na kiwi ki sorkar, neiliang u MLA wa samen ka NCP, u Saleng A Sangma da ong u wa i elaad ya kiwi ki sorkar wow theh poisa daw wanrah ko yei eh i khoo hadien habood deiwa kylli leh wa lada ka sorkar Nepal e yarap ko ya ki kaam pynroi ha Langpih, ye hi mo wow pdiang yeitæ?

Advertisement ad1

0 Comments

Leave a Reply