Shillong: Uwi na kiwa yahkhmat ka Congress uwa jooh man leh kam u montri warim ka sorkar pyrdi u Salman Khurshid da ong u wa i yut ki kattu katni ngut ki MLA ka Congress ha kani ka jylla man i lakam wa yut neiwa bha cheiwa sih.
Hawa yaklam wa kiwa pathai khubor ynne ka sngi ha Shillong, u Salman da ong u wa kitu kiwa da roi da san da chukor ki khlem kynmoo tamdien ya ki kaam wa bha wa leh ka party ya ki.
Da ong u wa lada sñiaw ki wym hun ki yeiwa leh ka party weiwa kwah ki wow mih noh na ka ym em kiwon kiwon wow khang tangwa chong i pyn haki hi. Da pynrap u deiwa ong wa heithaw wow mih ki deiwa suk da pyrchang pathan ki wow thooh daw wei da mylliñ ki ya ki snem wa da pynheh pynsan ya ki.
Chooh chooh da ong u walada kreh ki hapoh ka party kawa heh ym ye u man wow myntoi samen tangwa em chiboon kiwi ki phang kiwa haap chong bichaar bniah bha neibhah wa em kiwa ye u man kaam katwa kiwi tawon deiwi won.
Heijooh i por da ong u wa ha ka kaam saiñ hima ki parom nadooh nachwa da yoo da sakhi hawa em kiwa mih na ka party boon won ki wow psiah hadien wa mih ki, wei ymtoh de wow khut biang ki cha ka party.
U Salman da ong u leh wa ka party chim bait ko ya u Rahul Gandhi wow man kam uwa yahkhmat ya ka kam u President wei i bor hi leh chong i ha oo.
Da beiñ joor u leh ya ka BJP deiwa pynbaad wa man ko ka seiñ kawa pynkylla pyrtuid hi-eh ya ki scheme wa wanrah da ka Congress wei i rukom pynkrehkaam ya ka Swachh Bharat leh ym poi i cheiwon cheiwon neibhah wa hadoh katni ympu em kawi wot ka wah, ka nongbah, wa ki thaw wa khooid.
Da pynkut u deiwa ong wa da pyndep rukom hi-eh ya kani ka kaam deiwa ksoh saroo du wow lum sarok i wa khlemkaam wei da ong u wa khlem pep kaani ka sorkar BJP daw piah daw pra ko na ki kaam thok yong ka.
Discussion about this post