Shillong: U Montri Rangbah ka jylla u Dr. Mukul Sangma hawa yaklam wa kiwa pathai khubor ynne ka sngi da ong u wa u pynyabi ya u Aadhaar wa ki Bank Account kamjooh leh wa ki mobile man i kam wow knieh ya i hok samen ki paidbah katkam ka riti synchaar ka ri India waroh kawi.
U Dr. Mukul da ong u leh wa da yaklam u wa u Montri Rangbah ka Assam, u Sarbananda Sonowal hajaron wa ym emkaam ya u Aadhaar hapoh kini ki ar jylla wei da thoh leh cha ka sorkar pyrdi hei yatoh wa ini wow pyllait ko ya kani ka thaiñ mihsngi na i pynpsiah pyrtuid ha u Aadhaar.
Da ong u Dr. Mukul wa ka thaiñ mihsngi wot tang ya ka National Population Registration leh ympu dep leh, wei u Aadhaar daw wailaad u ya kiwa na baar wow man tre chnong ki wei ymye de wow tipmit ya ki tre namo kiwa na baar.
Heijooh i por da ong u wa i pynbor ka sorkar pyrdi wow pynemkaam ya u Aadhaar da wanrah i yei kulmaar ya ki paidbah khamtam heipor wa chah hukum ki ha ki bank wa ki company wow leh yeini.
Discussion about this post