Ki seiñbhalang wa ki bru kreh mon sñiawbha ka Garo Hills da takit bniah ki na u Montri Rangbah, u Conrad K Sangma hajrong i rai yong ka sorkar wow thung ya ka ‘Expert Committee’ neibynta wow pynthymme ya ka aiñ bhah kaam namo ka Reservation Policy.
U Montri Rangbah da khut yachem u wa ki seiñ na Garo Hills ynne ka sngi ha Circuit House, Tura yow pynche hajrong i pynkrehkaam ya ka Roster System wei ha kani ka yalang neiliang ki seiñ kiwa da poi da takit ki leh yei rai yong ka sorkar wow thung ya ka Expert Committee. Ya kani ka yalang wow yachem wa ki seiñ da dep wow pynbait ha ka 30 tarik u Naisan tangwa ki seiñ na Garo da kyntait ki wow wan cha Shillong hadooh wa hap pyndam ya kani ka yalang.
Hawa klam hadien ka yalang, u Conrad da pyntip u wa ka sorkar da pynche u yeiwa da kylli ki hajrong ka Roster System waka Expert Committee wa da thung yow pynthymme ya ka Reservation Policy.
Neiliang u Conrad da ong u leh wa ka sorkar hadien wa da dep wow pynche yei pynkrehkaam ya ka Roster, ha ka tayaaw wow wan daw chim ka rai hapoh ka Dhab ki Montri (Cabinet) kammon wow pynlai chakhmat yei kaam.
Katkam wa khana u Conrad da em hadooh 18 tylli ki seiñ kiwa da lai chimbynta ha katai ka yalang wei neiliang ka sorkar da pynche ko leh yei thung ya ka Expert Committee toh hadien i e yumut na waroh ki seiñ saiñpyrthai wei da pynche u leh wa ka Expert Committee ymtoh ka wow chim yei rai u pynthymme ya ka Reservation Policy, tangwa toh u puræ bniah wei wow phah won yei e yumut ki namo ka bui (Report) cha ka sorkar.
Da pyntip u leh wa daw phah ya kani ka Expert Committee wow yachem wa waroh ki seiñ kamjooh wow pait kammon da seiñ ya ka Reservation Policy nadooh ka sdang wei kammon i thaw yong ka hapoh ka jylla waka ri waroh kawi.
