Ka South Western Railway ka Indian Railways da yoh ko yei naam kam ka Railway Platform wa jrong dooh hapoh pyrthai kawa em ha chnong Hubballi, Karnataka ha Shree Siddharoodha Swamiji Station.
Kani man ko kam chibynta ka Hubballi Station kawa dang dep chna pynthymme hei lut wa T. 20 klur yow suk u pynlai pynwan ya ki rel ha Shree Diddharoodha Swamiji Hubballi Station.
Kani ka Station man ko kawa emkaam bha kam ka thaw pynpoi ya ki mar ha ka khayi pateiñ ha North Karnataka neibhah ki rel wa poi heini lai won ki cha Bengaluru, Hosapete wa cha Vasco-Da-Gama/Belagavi.
Yow pynkyllooid ya kani ka Station najrong ki 5 tylli ki Platform wa da em chwa, da booh sa kawi ka Platform No.8 kawa jrong 1507 meter kawa da man leh kam kawa jrong dooh hapoh pyrthai.
Ya kani ka Railway Station da wan wai da u Prime Minister ka ri, u Narendra Modi ynnin ka sngi deiwa wai u leh ya ka bynta Hosapete-Hubballi-Tinaighat kawa da pyndait da ki sainar bordiñ yow pynlai ya ki rel kawa da pynlut T. 530 klur.
Deiwa pynemkaam da ka bordiñ daw yarap ko wow pynduna yei lut wa T. 250 klur chi snem deiwa dam u thied 2,50,000 kilo-litre i Diesel chi snem.
