Yoh ka Jowai Municipal Board ya ar tylli ki truck kit jhep

Ynne ka sngi ka Jowai Municipal Board (JMB) da yoh ko ya ar tylli ki truck kit jhep hapoh ka 14th Finance heiwa ya kini ki truck da wan wai ya ki da u MLA ka Jowai, u Wailadmiki Shylla ha ka yalang wa da pynman ha pchem kani ka yung krehkaam heiwa ya ka yalang da pynlai da u Chairman ka Board u Fidel War. 

Ha kani ka sngi da emlang leh u CEO ka Board, u PK Boro, u MDC ka JHADC, u O. Lamin wa ki waheh chnong na Jowai kiwa em hapoh ka satri ka Synjuk Waheh Chnong Jowai kam u AN Niangti wa u LD Lakiang wa kiwi kiwi. 

Neiliang u Niangti uwa man leh u President ka Synjuk ki Waheh Chnong da ong u wa miet wa step kiwa chong chnong da Phone ki heiyatoh wa i eh i khoo wa yachem ki paidbah khamtam wa i kaam wa noh jhep wei da kyrmen u wa deiwa yoh ya kini ki truck daw pynsuk i ya ki paidbah. 

Chooh chooh da ong u wa ka Synjuk da jooh yaklam ko hajrong ka Waste Treatment Plant wow pynsuk wei wow yoh myntoi kiwa chong chnong. 

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

Neiliang u LD Lakiang da ong u wa la 12 snem da man u kam u waheh chnong da yooluti u wow yoh ya kiwa boon ki kaam pynroi kamwa yoh chawi neibhah ka Jowai hanla man ko ka thaw sor namo ka Urban Area dang em chiboon i duna yei yoh yarap ko, kamtæ da kyntu u ya u MLA wa ya ka sorkar wow chna noh ya ka Municipal Board wa paka. Da ban joor u leh yei emkaam wow em i bahkhlieh wow thooh ki thaw wow chna ya ka thaw noh jhep namo ka Waste Treatment Plant kawa katkam ka juk stat kawa katni. 

U Wailadmiki hawa e yei klam da ekhublei u ya kiwa kreh ka JMB kiwa da wan chaphrang kam heini i por wa wan ka khlam COVID-19 wow yarap hawa em kiwa khlaad wei wot hadooh wow pynkhooid namo wow Sanitize ya ki thaw paidbah.

Da ong u wa kani ka kynti man ko kam ka dak wa da sdang yoh ya ka Board deiwa pyntip u leh wa hajrong yong kini ki ar tylli ki truck wa ha ki sngi wow wan daw yoh sa kawi ka truck na ka 15th Finance. 

Chooh chooh da ekhublei u leh ya u montri ka sorkar wa pait ya ki kaam pynroi sor wa da chimkhia u wow pynsmat u yoh ya kini ki truck. 

Heiyatoh wa i thaw nohjhep ka JMB da pyntip u wa katkam wa man katni neiliang ka chnat Urban da chna ko ya ka Task Force tangwa ka JMB dang chong pyrkhat yillu bha hajrong ini neibhah manda yoh i thaw kam na ki seiñ wa ka District Council, daw pynsuk ko ya ini i kaam heiwa ka Council da rai ko wow e ya i thaw wa paka neibynta ini i kaam.