Uwa yaleh RTI ka jylla, u Disparsing Rani, da pyntip u wa katkam i yaleh RTI yong oo na ka chnat i chait i khiah yong ka sorkar jylla wa na ka sorkar pyrdi da chem wym yatoh yeiwa e jubab u James Sangma, Montri ka chnat i chait i khiah yeiwa kylli u MLA ka North Shillong u Adelbert Nongrum heiyatoh wa i yoh poisa wow yaleh pyrchah ya ka khlam COVID-19.
U Disparsing da ong u wa u James Sangma hawa e yei jubab ya u Adelbert hapoh ka Yung Dorbar Chna Aiñ da ong u wa ka sorkar jylla da pynlut ko T. 816 klur wei ka poisa wa ka jylla da yoh na ka sorkar pyrdi da man ko T. 76 klur.
Heiyatoh wa ini, u Disparsing da lai paan u ya ka RTI na ka chnat i chait i khiah yong ka jylla deiwa kylli katwon ngut kiwa hapoh ka jylla kiwa yoh ya u COVID-19 kamjooh kiwa khlaad na uni u khñiang khlam wa katwon wa da yoh poisa naka sorkar pyrdi wow yakhun ya kani ka khlam hapoh ka jylla.
Da kylli leh cha katwon ngut wa da su T. 50,000 cha ki manyung wa em wa khlaad na u COVID-19 heiwa da yoh jubab wa da em 1624 ngut kiwa khlaad wa 96,785 ngut kiwa da dep yoh ya uni u khñiang.
Heiyatoh wa i lut i sep, u Disparsing da paan RTI u leh na ka chnat i chait i khiah ka sorkar pyrdi ha nongbah Delhi, heiwa da pyntip wa sorkar bei ha ka bynta wa nyngkong namo ka Phase-I da pynlait ko cha ka jylla Meghalaya T. 15 klur, 61 lak wei ha ka bynta wa ar namo ka Phase-II da pynlait T. 104 klur, 12 lak kawa dapoi T. 119 klur tam.
Kamtæ da ong u wa hawa jubab u James hapoh ka yung dorbar, da ong u wa da yoh T. 76 klur na Delhi, katwa ka jubab wa da yoh u Disparsing na Delhi da ong ko T. 119 klur iwa da yaphær T. 43 klur kawa ym tip cheiwon da pynmkaam ka lane cheiwon wiar ko.
U Disparsing da ong u wa kamwa jubab u Montri, waroh wa da pynlut hapoh ka jylla toh T. 816 klur iwa mut lada ah ya kawa yoh naka sorkar pyrdi kawa T. 119 klur, ka sorkar jylla da pynlut ko T. 697 klur na ka hi.
Puræ leh: Palat T. 655 klur da pynlut ka sorkar ha ki ar snem neibynta ka khlam COVID-19
