Ha ka yalang hapyrdi ki tre karkhana pynmih khyndaw-bilat wa 3 tylli ki seiñ yong ki tre Truck wa kiwa yah Truck wa ka sorkar da rai wow su Rs. 9 chi Ton chi Kilometer ka wow krehkaam hapoh ka jylla Meghalaya.
Neiliang ka sorkar hadien ka yakhih yong ka Meghalaya Commercial Truck Owners and Driver’s Association (MCTODA), ynne ka sngi da khut yachemlang ko wa waroh ki liang deiwa emlang ki seiñ kiwa kamai Truck wa ka seiñ ki karkhana pynmih khyndaw-bilat yow pynbait hajrong ka bai kit wa kiwi ki dawa yong ka seiñ kiwa kamai wei yah Truck.
Hawa klam hadien ka yalang, u Symbood Montri Rangbah uwa pait leh ya ka chnat Transport, u Sniawbhalang Dhar da ong u wa kani ka rai wow su bai kit Rs. 9 ha Meghalaya da mynjurlang da waroh wei da pyntip u wa chwa yeini da su Rs. 7 hadooh Rs. 11 chi ton hapoh chi Kilometer wei katkam wa man ki sarok.
Da ong u wa dang em kiwi ki dawa wa ka seiñ kiwa kamai Truck da booh ki wei daw yaklam biang manda yachem ha ka 21 tarik uni u bnai.
U Sniawbhalang Dhar da pyntip u wa iwa dang sah wow yaklam toh yei dawa wow e kit 120 tylli ki Truck ki tre chnong ha ka chi sngi, wei da khana u wa kamwa man kattæ 80 tylli ki Truck ki tre chnong wa yoh ha ka chi sngi, wei kattæ i dawa toh wow pynku cha ka 120 tylli katwa neiliang ki karkhana pynmih khyndaw-bilat da tyrwa ki wow e kit 100 tylli ki Truck yong ki tre chnong chi sngi.
Discussion about this post