U MDC ka Ummulong-Moodymmai Constituency, u Jesse Suïam da wai paidbah u ya ka Community Cum Youth Training Centre yong ka Dong Pyrdichnong kawa ha chnong Moodymmai, West Jaiñtia Hills.
Ya kani ka Community Cum Youth Training Centre da chna lyngba ka Special Assistance Grant (SAG) Scheme yong u snem 2019-2020 ha i lut wa T. 2 lak.
Chwa wow wai ya kani ka yung da em ka yalang wa tbian wa pynlai da u Starwell Ryngkhlem hei emlang kiwa kitkaam ka chnong wa yong ka dong.
Da yoh ya i klam na u Waheh Chnong ka Moodymmai, u Joseph Pariat, u Chairman ka chnong Moodymmai u Emris Ksoo wa na u Secretary Dong uwa da pynsñiaw yei sñiawngooh ya ka Balang wa da chah sñiawbha ko wow pynman ya ka yalang nachwa ha ka skur yong ka.
Ka Dong Pyrdichnong Moodymmai dap ko dei sñiawngooh ya ka Dorbar Chnong kawa da e sñiawbha ya ini i thaw wa da yoh wow chna ya kani ka yung ka Dong kamjooh leh ya u MDC wa MLA ka thaaiñ kiwa da e ya kani ka Community Cum Youth Centre.
Neiliang u Jesse Suïam hawa e yei klam da ong u wa da pyrchang u katwa ye wow e i chakri wa janai cha ki paidbah deiwa khooid ya waroh ki chnong hapoh ka Constituency.
Da ong u wa oo toh u bru uwa kwah bha wow kyntu kynrong ya i roi i paar hapoh ka Constituency wei hawa saam ya ki Scheme da leh u khlem ñiaw chiliang yeiyi yeiyi leh tangwa neibynta i bha i miat yong waroh.
U MDC da kyntu u leh ya kiwa chong chnong wow man kiwa sñiawthooh yumut wei wow yakrehlang khnang wa ka dong wa ka chnong u ku ko ha i roi i paar deiwa pynrap leh wa emkaam wow em i sñiawtre ya kani ka yung kawa da mang kyrpang neibynta i bha i miat ka dong wa ka chnong waroh kawi.
