Katwa dang lai ki por i dawa wow em ki Khnap Thang Bru kawa tip kam ka Kambel Shullai Eco-Friendly Crematorium dang joor i, kamtæ ynne ka sngi ka Seiñraij Jowai da yoh ko wow wai ya kawi na ki ha Khliehriat Turiem, Khliehryrchi harood u sarokbah Jowai-Shillong.
Ha kani ka sngi da em ka yalang wa tbian heiwa u MP ka Shillong, u Vincent H Pala uwa da e yarap wow chna ya kani ka Khnap Thang Bru da man u kam u kongsan wei ya ka yalang da pynlai da u President ka Seiñraij, u Hercules Toi wei da yoh ya ki kyntien ngooh Blai na u Pator ka Elaka Jowai, u Raymond Nartiang.
Ha ka yalang da emlang u Dolloi ka Elaka Jowai, u Puramon Kynjing, u Waheh Chnong ka Khliehryrchi u Kitbok Rymbai, ki waheh wasian ka Seiñraij Jowai kamjooh kiwa ha-yung ha-sem ka Rina Challam kawa da e sñiawbha ya i thaw wow chna ya kani ka Khnap Thang Bru.
U Vincent H Pala kam u kongsan da ong wa kam u MP da lai luti u la le sien kattu wei ymjooh kyntait u wow e yarap ya kiwon kiwon ki yarap cha ki Seiñraij waphær waphær.
Da ong u wa kam ki manbru beh i ya ka spah tangwa i burom hi toh iwa kordor tam.
Chooh chooh da ong u wa ha ka Khnap Thang Bru toh wow pyndep ya ka niam wa khaddooh yow man ko kawa dei emburom.
U Vincent da yaroh u leh ya ka Seiñraij kawa da pynkrehkaam ha kylleiñ ki thaw deiwa ong u leh wa emkaam bha wow booddien ya ki kaam wa yatoh wa ki yarap na ka sorkar wei wow pynemkaam hok ya ki Scheme.
Ha kani ka yalang da yoh leh i klam na u President warim ka Seiñraij Jowai, u OR Challam, u W. Challam uwa man u kñi yong ka kur Challam wa da e sñiawbha ya ini i thaw, u Kitbok Rymbai wei da yoh ya ki kyntien khublei na u Secretary ka Seiñraij, u Awrotki Sumer.
Discussion about this post