Ka chnong Wahiajer da man ko ka chnong wa ar wa em ha waroh kawi ka Ri-loom Jaiñtia wow yoh yaka PRIME Hub kawa em hajan ka madanbol warim ka chnong heiwa ynne da wan wai ya kani ka thaw da u Montri Rangbah ka jylla, u Conrad K Sangma.
Kani ka PRIME Hub toh kawa da em chwa ha yung krehkaam ka Thadlaskein C&RD Block tangwa kawa wai katni toh kawa em ka thaw e sikai, ka karkhana kreh deilang ka Cold Storage yow booh ya ki mar yow lait ki u pyut.
Ka Prime Hub wa pura wa nyngkong ha Ri-loom Jaiñtia toh kawa em ha Laskeiñ wei kani kawa ha Wahiajer u pynlai yaka da ka Wahiajer IVCS.
Najrong i e sikai, daw yarap leh u pynlai yaaw ya ki mar.
Kamwa man kattæ u sdang chwa du wow chna saroo heiwa da em leh ka kor wow pynsmat u chna saroo.
U Montri Rangbah hawa e yei klam da ong u wa nachwa da chalan ya u saroo kam u phlang iwa dapoi hadooh Rs. 1000 klur chi snem tangwa kattu deiwa pynyklla ya uni u phlang kam u saroo wa ye u pynkemkaam daw ku ka yoh nong cha Rs. 2000 klur chi snem.
Chooh chooh da ong u wa ya kani ka PRIME Hub toh kawa da ye u pyndep du hapoh kattu katni bnai donhi kawa da jooh chimpor kamwa 8 bnai wei i lut toh Rs. 4 klur yow chna ya kani wei da ong u leh wa kmen u wow khana wa ha kani ka thaw da pynemkaam dei bor ka sngi namo ka Solar Energy.
Nyngkong ha kani ka thaw u chna du u saroo wei hadien daw man ko leh neibynta ki warep sapdok wa ki warep syiñ wei ka sorkar da booh thong ko wow chna palat 50 tylli kam kini ki PRIME Hub ha waroh ki District ka jylla.
Ha kani ka yalang da emlang ki Symbood Montri Rangbah, kitæ u Sniawbhalang Dhar, u Prestone Tynsong deilang wa u Montri Sorkar, u Comingone Ymbon, u CEM ka JHADC, u Thombor Shiwat, ki MDC, ki bor District wa ki bru paidbah.
Discussion about this post