15 49.0138 8.38624 1 0 4000 1 https://wyrta.com 300 0

Yoh kem drug Yaba ki pulit wa khia duna 2 kilo, chah kem uwi

0 Comments
Advertisement ad1

Shillong: Ki pulit ka Anti-Narcotics Task Force (ANTF) ka East Khasi Hills deilang wa ki chipai ka Assam Rifles ha i janmiet yong ka 20 tarik da yoh kem ki hadooh 1915 gram ki dawai kuli Yaba wei da kem leh ya uwi u bru uwa tip pyrtuid kam u Pinak Das na ka yingkieñ Umshyrpi, Shillong.

Katkam wa pyntip ki pulit, ha i por kamwa 9:30 i step da yoh yutip wa u Pinak Das daw pynpoi u ya ini i drug cha nongbah Shillong, kamtæ da yang khap ki pulit wei da yoh wow kem noh ya utai u bru na yingkieñ Umshyrpi ha i por 5:30 i janmiet neidaw wa utai u bru da mut u wow kylliang ya i thaw pynpoi waroh chi sngi na Shillong cha Upper Shillong wa Sohra, tangwa hadien da wanpoi biang u cha Shillong da ka Scooty kawa em ya u number ML05L 9706, wei hawa khynra ya katai ka Scooty da yoh wow kem ya kitai ki dawai pynmuaid Yaba kiwa khia 2 kilo duna.

Katkam wa pyntip ki pulit ya ini i drug da e kti da uwi u bru wa tip pyrtuid kam u Baskhembor Nongbet ha u Pinak Das ha kawi ka thaw ha Upper Shillong, tangwa ym em yoh kem ya u Baskhembor neidaw wa da yoh u wow phet heipor wa da doom.

U Baskhembor toh u chnong tre na Sohryngkham wei kreh u ha ka Import Export Company kawa em ha Mawkyrwat. Ki pulit da lai ki wow khynra yaka yung wa sah u Baskhem ha i por chiteiñ synyaw, tangwa ym em yoh ki oo wei i thooh ya uni u bru dang pteiñ i.

0 Comments

Leave a Reply