Ki pulit ka East Jaiñtia Hills ynne i step da yoh ki wow kem ya uwi uwa dai drugs uwa wan na Aizawl yow lai cheiliang Guwahati uwa da wan da kawi ka Night Super Bus wa em Number AS-01LC-6216.
Ki pulit hadien wa da tip ki dei tikna, da pynsangeh kari ki ha rood u sarok NH-6 ha BMS Petrol Pump, Nongsning wei heipor 9:00 waje i step da poi kani ka Bus heiwa da thooh ya uwi u bru wa da tip ki pulit wa pyrtuid kam u Joseph wei da chem ya oo leh napoh kani ka Bus.
Hawa kynreh ya oo da chem napoh ka Suitcase wa rah u ya iwi i yusong hapoh Plastic wei manda wai hadien wa dep Test da pyntikna wa ini toh i Crystal Meth (Amphetamine) wa khia 1.017 Kg iwa man i drugs wa pyrchah ya ka aiñ.
Ini wa yoh kem dang man i i wym pu em dep pynchna iwa dang man kam ki jiat mooria kymphor (Crystal).
Uni uwa chah kem uwa pyrtuid tre Joseph Hmangaih Zuala (46 snem) uwa na Aizawl, Mizoram man u kam uwa kit yeini i mar yow pynpoi cha baar ri kiwa daw pynkhooid pynchna ya kini ki moo Crystal yow man ki kam ki dawai kuli wei ini man ko leh ka rukom khayi wa dang chem thymme ki pulit.
Kini ki Crystal Meth wa yoh kem toh iwa da antaad wa chongdor Rs. 1.5 klur.
Ya uni u bru da pynngat hapoh ka aiñ NDPS Act wei ya ka takit da booh ha Khliehriat Police Station yow chemdien ya waroh kiwa emkti ha ini i kaam.
Kam wow pynkynmoo wa ini toh i sien wa ar wa yoh kem Crystal Meth ki pulit ka East Jaiñtia Hills heiwa ha u Naikhynde uni u snem da yoh kem 10 Kg iwa chongdor Rs. 15 klur.
Puræ leh: Yoh kem ki pulit ka East Jaiñtia yei drugs Crystal Meth wa khia palat 10 Kg
Discussion about this post