Yoh kem ki pulit ka EKH ya u drugs wa T. 4 Klur na ka bus Manipur

Shillong: I thmu yong kiwa khayi drugs wow pynpoi ya uni u mar cha Shillong da man i iwa sepai hadien wa ki pulit ka Anti-Narcotics Task Force yong ka East Khasi Hills ryngkat ki pulit ka Mawryngkneng Police Station heipor chiteiñ synyaw ka Sngi Chohthat da khyrrup ki hadooh chi kilo duna i drugs wa chongdor palat T.4 klur na kawi ka bus ha ka thaaiñ Mawryngkneng.

Ka Superintendent of Police ka East Khasi Hills, ka Claudia Lyngwa da ong ko wa hadien wa ki pulit da yoh yutip ki wa daw wan i drugs nei duna i challan nei oor khyndaw ha sarok wa wan na Manipur cha Meghalaya da pynman ki yei paitsiar wa i yang wow kem ya kiwa thmu wow pynpoi ya uni u jaitdih pynmuaid cha Shillong.

U Sub Divisional Police Officer (SDPO) uwa yahkhmat ya ka ANTF, u Jagpal Singh Dhanoa da ong u wa hei miet ka 10 wa 11 tarik nadooh i por chiteiñ synyaaw ki pulit da pynman ki yei kynreh ya ki kari wa wan psiah cha kani ka jylla deiwa ksoh ya waroh ki kari kamai.

Ha ini i kynreh ki pulit da kem ki ya kawi ka bus wa em number MN 04 P 1451 na kawa da yoh 3 tylli ki muna wa mantre da ka Veineithem Hoakip (25 snem) kawa da yah ya uwi u khynnah wei napoh ka muna da chem 80 tylli ki synduk sabon wa da song drugs wa khia hadooh 930 gram.

Related posts

Yoh kem mooyong hadooh 6000 MT ha East Jaiñtia Hills

May 10, 2025

Chem drugs ki pulit napoh ka kari wa chah ieh ha Jowai Bypass

May 7, 2025

Da ong u wa ki pulit heipor wa ksoh ki ya ka bus, ym em chem ki ya kini ki muna wa da murieh ha iwi i kdong wa da chna kyrpang, tangwa hadien wa pait bniah ya ki kot kari da chem wa toh u em kamwa 20 tylli ki muna (luggage) yong kiwa chong kari, tangwa ki pulit da yoh ki du kamwa 12-13 tylli wei hawa kynreh chooh chooh da chem ya kini ki 3 tylli ki muna na ka kamra wa da chna kyrpang hapoh ka bus.

Neiliang ka Lyngwa da khana ko yei sñiawkhia wow chem ya kani ka bus wa em ko ki kamra wow murieh tiar wei da ong ko wa boi ymtoh kani ka sien wa nyngkong wa da kit ya kam kini ki mar ha kani ka bus. 

Da ong ko leh wa uni u drugs wa thmu wow pynpoi cha Shillong ye u wow poi cha ki hajar ngut kiwa dih drugs. 

Ka SP da ong ko wa hawa yaklam wa ki doctor da pynsñiaw ki wa lada ki paidbah ym chimkhia ki wow pyndoohjait ya u drugs wei lada ym yakrehlang ki, du hapoh 2 næ 3 snem ye wow dooh hadooh 50 wa 60 percent ki khynnah du ha nongbah Shillong.