Ki pulit ka West Garo Hills da yoh ki wow kem ya 8 ngut ki bru kiwa da thok chukor ya ki bru ka Garo Hills deiwa pynbiej ya ki wow phah poisa deiwa chah phon lyngba u WhatsApp deiwa kam wa ki toh ki heh sorkar.
Ka takit toh kawa da leh la ar bnai heiwa ki pulit ka West Garo Hills da lai ki cha Rajasthan, Uttar Pradesh wa Assam yow kem ya kini.
Uwi na kiwa chah thok toh uwa kreh ha yung krehkaam u DC ka West Garo Hills ha Tura heiwa da chah sai T. 5,50,000 napoh ka Bank Account yong ka ha u Naitung (Apr).
I rukom chah thok ki bru toh deiwa yoh Message ha WhatsApp deiwa kam wa ki toh ki sahep sorkar heiwa uni uwa chah thok da yoh Message u na iwi i Number wa em i dur u DC uwa da tip leh yei pyrtuid u kamtæ da chaniah u wei da leh u kamwa phah ya oo wow thied ya ka Gift Hamper wei wow phah poisa cha kawi ka Bank Account heiwa da chah sai noh ka poisa u.
Neidaw wa tieñ won wow pynbaad ya u DC wa thok u, uni u bru da leh u katkam wa phah ya oo wei hadien ini da sñiawthooh u wa da chah thok u.
I takit ki pulit da yah ya ki cha Rajasthan nyngkong heiwa da yoh chwa ki wow kem ya 4 ngut ha kani ka 10 tarik kiwa emkti wow chukor bru.
Hadien wa takit ya kini, ki pulit da lai ki cha Uttar Pradesh heiwa da yoh wow kem sa 2 ngut haka 16 tarik uni u bnai.
Ka takit da pynpoi ko ya ki pulit sa cha Assam heiwa da yoh wow kem sa ya arngut haka 19 tarik uni u bnai. Waroh kini da wanrah chapoh ka jylla Meghalaya wei da yooluti leh wa daw kem ya kiwi de kiwa emkti heini katwa ka takit dang lai ko.
Neiliang u SP ka West Garo Hills, u VS Rathore da pynkup burom u ya kini ki pulit kiwa da kem ya kini ki bru wa emkti wow thok u chukor ym du ya kiwa napoh ka jylla kamjooh leh na kiwi ki jylla ka ri.
Puræ leh: Phah husiar ki pulit lada yoh Message na kiwa kam toh ki heh sorkar hadooh ki Montri sorkar
