Katkam wa pyntip ki pulit, haka 17 tarik uni u bnai heipor 2:30 i step heipor wa leh ki yaka Patrolling Duty na Umkiang cha Malidor, ki pulit da chem ki ya kawi ka Truck wa em ya u number RJ-02GC-1211.
Hawa takit ya ini, uwa yah yaka truck u Surjit Singh wa uwa yarap ya oo u Ram Das da ong ki wa ka Truck toh kawa chalan murit heiwa da pynyoo ki leh yaki kot ki sla (Invoice wa e-Way Bill) kawa em yaka tarik 15-08-20 katkam wa da kam ki.
Tangwa hawa khynra ya kani ka Truck da chem ya ki churia wa kit kwai supari kiwa da booh hapoh ki churia wa booh murit.
Kiwa yah Truck ym ye ki wow sai yaki kot ki sla wa yatoh wa uni u kwai wa kit ki.
Ha iwi tawon i jia haka 17 tarik uni u bnai, u Raju Kumar Rai da ujor u wa haka janmiet kani ka sngi, hadien wa yoo u ya iwi i Advertisement ha OLX wa booh da u Ram Raj Singh, heiyatoh wow dai ya kawi ka Scooty wa em ya u Number NH-15EN-1502, da kynjoh ktien u ya uwa dai yow thied ya kani ka Scooty wei da su u leh T. 38,000 lyngba ka Google Pay. Hadien ini da sñiawthooh u wa da chah thok u.
