Shillong: Ki pulit ka East Khasi Hills ynne da yoh yutip ki wa daw em ki bru wa wan na Guwahati kiwa ye wow kit ya ki mar wa man pyrchah aiñ katmtæ ki pulit ka Special Cell ka Cantonment Beat House da kreh ki wut wut hajrong ini.
Ki pulit da yoo ki ya kawi ka kari kawa lai lyngba na Garikhana wei da psiah ko cha Khlieh Iewduh wei da pynyieñ ya ka ha Parking Lot kani ka thaw.
Manda kynreh ki pulit ya ka kari da chem ar tylli ki muna wei hapoh yong ki da em ki yusong wa da song daka kot khubor wei da biah ya ki da ki Cellotape wei uwa yah kari da ong u wa kini ki yusong toh ka poisa.
Ya uwa yah kari wa kamjooh yaka kari da yah cha yung krehkaam ka SP wei manda takit neiliang uwa yah da ong u wa kini ki yusong toh neibynta kawi ka bru na Laban.
Katkam i rukom krehkaam kit poisa, ya kani ka kari toh u booh ha iwi i thaw ha Guwahati heiwa daw em ki bru ki wow wan ekti ya ki mar ha kani ka kari wei manda poi ha Khlieh Iewduh daw em biang kiwi tawon ki bru wow wan thooh ya ki.
Neidaw wa kani ka kaam yatoh ko wa ka poisa wa boon, kamtæ da pyntip leh ya ki bru ka Income Tax Department wei da khoh ya kini ki yusong hei emlang ki sahep kani ka chnat hei emlang ki bru na ki Bank heiwa da ñiaw ya kani ka poisa.
Ka poisa wa em hapoh ki yusong em ko T. 2 Klur 6 lak wei da suba wa kani ka poisa toh neibynta i ksiar mo i drugs.
Discussion about this post