Katkam wa pyntip ka DC ka East Khasi Hills District wa ynne ka sngi nyngkong ki 10 sngi wa da pynkrehkaam ya ki kyndon wow kdooh u khoom ya ka sor Shillong wa ki khapsor, da yoo yei duna i em ki kari wa lai wa wan wei kiwa lai yei kaam wym hoi u dam da chah ya ki hadien wa ye ki wow pynsakhiat.
Tangwa da em leh ki kari kiwa da pynemkaam da ki Car Pass ki warim heiwa ya kini da maham ya ki wei nadooh ka Monday lada dang em kiwa leh ya ini daw chah daiñ kuna ki.
Da booh leh ya ki thaw pynsangeh kari namo ki Checkpoint heiwa ha Mawiong Checkpoint da yoh wow kem ya kawi ka Bus kawa kit ya kiwa wan na baar jylla cha Shillong kawa da yoh u lai lait na Umling wei da phah wow lai cha Polo yow leh yei Test.
Da em leh kawi ka Bus kawa lai luti na Meghalaya cha Silchar da pynsangeh ya ka heiwa kiwa hiar ha Shillong da phah ya ki wow leh Test ki.
Da em leh ki arngut kiwa tyngkheiñ ya ki kyndon wow chong kset heiwa da pyntip cha ki Magistrate yow leh ki yeiwa emkaam. Da phah khang leh ya ki 4 tylli ki dukan ha Golf Link Pdengshnong da ka Dorbar Chnong deiwa pyntip chwa cha u Incident Commander neidaw wa tyngkheiñ ki ya ki kyndon.
Da yoh leh ya i kyrpaad na kiwa boon ki bei ki pa yow chah ya ki khon yong ki wow lai ki na kawi ka District cha kawi yow ye ki u lai cha Shillong yow pyndep ki ya ka Board Exam ha ka 3 tarik wei ya kini daw e da ka ‘One Day Pass’ da ki jar jiar ki DC lane ki BDO.
Ynne ka sngi da em leh ki 4 tylli ki thaw wa sah ki bru kiwa da pynbna kam ki Micro Containment Area katwa ka Eee Vee Nora Girls Hostel, Mawlyndop, Mawlai Mawroh da pynbna kam ka Macro-Containment Area neidaw wa em kiwa yoh COVID-19 wei yow ye u leh yeiwa emkaam.