Ka Dorbar Chnong Ialong ynnin ka 1 tarik heipor 1 waje i sngi hadien i pynkhooid chnong deilang wa i pynyieñ ya ki kriah noh jhep wa yahkhmat da ka VO (Village Organisation) heiwa ya kini ki kriah da yoh sñiawbha na ka Tourism Department ka sorkar Meghalaya. Da pynman leh yei lai sonteri wei sylli bniah ya i miat i bha, i chongsuk chong chngaaiñ ka chnong khamtam ya iwa da booh da chna wa em ha ki thaw uiñke suwari ki paidbah da i yahkhmat yong ka VDP (Village Defence Party) ka Dorbar Chnong Ialong.
Hadien i pynkhooid chnong nadooh pyrdi chnong hadooh wa poi cha ka wah Myntdu. Deiwa ya krehlang ki para dkhot nadooh ka VO, VDP wa kiwi tawon ki lok ki jor da sakhi lang ya i pnylait symbe dakha da ki hajar tylli ha ka Um-Dalong Fish Sanctuary, Ialong kam chibynta wow pynmankaam yei angnood yong ka chnong neibynta u pynneh pynsah ya ki doh-um wa em ha kani ka wah, heijooh i por yow pynyoosuk yow pynkhriñ chooh chooh ya kiwa wan paitke cha kani ka thaw uñke suwari ki paidbah iwa daw man leh kawi na ki laad yoh kaam yoh jaam kiwa chong chnong ka chnong Ialong hi waroh kawi.
Da pyntip leh wa da khang pyrchah wym hoi dei u khwe, tong doh-um, u noh jhep, kawang moo, sait that, sait kari, u sum, baam doh, sah miet ha kani ka thaw nadooh wa da pynbna Sanctuary ya kani ka bynta (Um-Dalong “Deiñ-Rngam”) wei lada chem ya kiwa leh pyrchah daw ngat ki ha i pynchitom yong ka chnong.
U Waheh Chnong ka Ialong u T. Ram Phawa da e khublei kyrpang u ya waroh iwi pa iwi kiwa ya embynta lang ha kani ka sngi wa sah kynmoo ya ka Um-Dalong Fish Sanctuary, Ialong yow man kani ka Sanctuary kawa neh pateiñ sah pateiñ ya chiboon ki jait symbe dakha.
Kamtæ da paan yei ya krehlang yong phi ki paidbah yow ye u pynphet ya ki kaam chakhmat, khamtam hei wow pynwan dur ya ka chnong Ialong kam kawi na ki Tourist Spot wa bna naam yong ka ri-loom Jaiñtia waroh kawi.