Ka sor Shillong da yoh ko ya ka khusnaam “City with the Best Record of Public Involvement in its Transport Planning” neibynta ka “Shared Commuter Service in East Khasi Hills (Shillong), an initiative implemented by the Sustainable Transport and Efficient Mobility Society (STEMS)”, kam chibynta ka 16th Urban Mobility India Conference and Expo 2023, kawa pynman nadooh ka 27 hadooh ka 29 tarik uni u bnai ha New Delhi.
U Manoj Joshi, Secretary ka Ministry of Housing and Urban Affairs ka sorkar India da e u ya kani ka khusnaam yow tipmit yei pynkrehkaam ya ka STEMS ynne ka sngi kawa da lai pdiang da ka Isawanda Laloo, IAS, Secretary ka sorkar Meghalaya wei ka CEO ka STEMS, deiwa emlang ki bru wa kreh hapoh ka STEMS.
Kiwi de ki sor kiwa da yoh ya kani ka khusnaam hapoh jar jiar ki kyrdan toh ka Delhi, Lucknow, Srinagar, Bhubaneswar, Kochi waka Jabalpur.
Ini toh i sien wa nyngkong wa da yoh ka STEMS yei tipmit hapoh ka ri kawa da pynwandur nyngkong ha u snem 2021 da ka chnat Planning ka sorkar Meghalaya. Ya ka STEMS da pynkrehkaam ha uni u snem deiwa pynlait 30 tylli ki ki School Bus yow pynduna yei khynnia kari ha kiwa boon ki bynta ka Shillong.
Kini ki Bus toh kiwa emlang wa ki CCTV waka GPS Tracking yow tip ki bei ki pa ki khynnah heiwon poi ki Bus wei da em leh ki bru wa da thung kreh kyrpang yow pait ya ki khynnah kamjooh ki luti wa kyrpang yow lai kini ki Bus deiwa paan chwa yei sñiaw ki paidbah.
Ya ka STEMS da pynkrehkaam deilang waka Meghalaya Transport Corporation, NIC Meghalaya waka NIC Uttarakhand hei emlang ki pulit ka Shillong Traffic Police kamjooh ka Public Works Department (Roads).
Kini ki Bus toh kiwa da pynemkaam da 15 tylli ki skur wa em ha sor Shillong wei da pynsuk ko ya kiwa chong chnong kiwa jooh sahkut hadooh 70 minit man-ka-sng hei sahkut kari. Wei deiwa boon kiwa da kwah wow pynemkaam ya kini ki Bus, daw sdang leh wow pynemkaam waroh ki Bus kamwa da mang yow pynduna chooh chooh yei sahkut kari.
Kani ka Urban Mobility India (UMI) Conference and Expo toh kawa da pynman da ka Ministry of Housing and Urban Affair ka sorkar India wei da wan wai ya ka da u Union Minister of Housing and Urban Affairs .
Discussion about this post