Ki bor pait bor pynlai ka Blooming Buds Pre-School, Moosalyngkat, Jowai ha ka 14 tarik uni u bnai da pynman ki ya ka Educational Field Trip deiwa yah ya ki khynnah cha ka Jowai Fire & Emergency Station, Salini Colony, Mihmyntdu, ka Jowai Police Station, Iawmusiang wa ha District Early Intervention Centre (RBSK), Panaliar.
Neiliang u Aris Nongkynrih, Administrator BBPS da khana u wa ka thong yong ini toh wow khriñ yei pyrkhat pyrdaiñ ki khynnah najrong wa yoh ki u ap u sñiaw yei khana i batai kiwa sikai ha skur iwa man leh ka luti wow e mynsien wei u saiñdur yow man ki kiwa chlur.
Ha Jowai Fire & Emergency Station, Salini Colony, Mihmyntdu hei emlang u G.S. Singh (Sr. Station Officer), ki ar ngut ki Leading Firemen wa kynthup yow W. Pohthmi wa u L. Darnei da khana, pynyoo ki ya ki khynnah heiyatoh wei rukom pynemkaam ki pulit tympleh diñ ya ki tiar hawa em i iñ yung næ kiwi kiwi wym poi pyrkhat (Calamities).
Ha Jowai Police Station, Iawmusiang daioh yei khana batai na u I. Ksoo, 2nd O.C. Jowai Police Station uwa da khana chaphang i krehkaam ki pulit ha ki rukom waphær wei kyrpang leh i khana yow Emergency Number 112 wa 100 kiwa man ki Number wa suk u yoh yaklam wa ki pulit ha iwon iwon i por wa em i chah lehbor thombor ki khynnah ha ki bru damok næ ki bru wa sih, katwa ha District Early Intervention Centre (RBSK), Panaliar da embyntalang da ka Dr. Handaka Suting kawa da khana batai chaphang i krehkaam ka District Early Intervention Centre (RBSK), wei da pynyoo leh ya ki khynnah heiyatoh wa ki tiar ki tar wa pynemkam hawa sylli yei chait i khiah ki khynnah.
Discussion about this post