Ki pulit ka Laitumkhrah Police Station hadien wa yoh ar tylli ki ujor ha ka 15 tarik uni u bnai na ki ar ngut wa em u bru wa leh ki kaam khlem akor wei uwa bood ya ki kynthai deiwa leh ki kaam jakhlia wei uwa yah ya kawi ka kari Bolero (rong yong) wa em u Number ML-05P-7884 wei waroh ini da jia i ha kiwa boon ki thaw ka Laitumkhrah wa da leh da uni u jooh u bru wa yah ya kani ka jooh ka kari.
Ki pulit da pyntip ki leh wa da em ka FIR wa nyngkong kawa yoh ha u May 2025 heiwa kani ka jooh ka kari da yoo ka hajan ka Don Bosco Square, Shillong wei uni u bru wa yah kari da leh u ki kaam khlem akor deiwa yoo ki paidbah.
Da em leh sa kawi ka FIR wa sariem wa da e ha ka 17 tarik u September, 2025 iwa da jia ha ki bynta u sarok Dhankheti Malki wa kani ka jooh ka kari da em ko heipor wa uni u bru da leh u kini ki kaam khlem akor. Ha kawi won ka FIR wa da e ha ka 23 tarik u September, 2025 da ong wa heipor 8:00 waje i miet, kawi ka kari Bolero (rong yong) da sangeh ko hajan ki kynthai ha Don Bosco, Laitumkhrah wei uni u bru da leh biang u ki kaam khlem akor chwa wow yut u.
Iwi won iwa jia toh katkam ka FIR wa da yoh ha ka 13 tarik uni u bnai wa heipor kamwa 5:20- 5:30 i janmiet hajan ka Loreto Convent, Shillong, kawa ujor da ong ko wa heipor wa dang yang ya ka Rapido da wan kani ka Bolero kawa da pynhiar yit wei da sdang uni u bru wow leh ki kaam jahklia wei da bood u ka kani ka kynthai deiwa pynsangeh ka da ka kari u.
Kamtæ deiwa ya krehlang kiwa boon ki Police Station ka East Khasi Hills da yoh wow kem ya uni u bru deilang ka kari hei step ka 25 tarik wei uni u bru toh uwa tip kam u Tamdorlang Risaw (42 snem), uwa chong wa sah ha Nongrah Block II, Shillong wei i thaw wa kem oo toh na Tawang, Mawsynram da u Officer-In-Charge ka Mawsynram Police Station deilang ki bru u.
Ya uni u bru daw lai yah oo hakhmat ka yung bichaar yow leh katkam ka aiñ.
Discussion about this post