Hadien wa chah pyndik ki Pnar ka chnong Lapangap ha ki Karbi na Tahpat wa kiwi ki chnong wow ah ya u kba iwa da sdang nadooh uni u Naichiphaw ha Pynthor Lapangap, kattæ i ah ya u kba da pteiñ i hadien kamwa 2-3 tayaaw.
Ya u kba da sdang chwa u ah ha ka tayaaw wa nyngkong uni u bnai tangwa da hap wow sangeh ha ka 9 tarik hadien wa em u bru wa yap na ini i kynaad wei da sdang biang yei ah kba nadooh ka 23 tarik uni u bnai deiwa soi ya ka soskular hapyrdi ki ar liang.
U Deimonmi Lyngdoh uwa man u Waheh Chnong ka Lapangap da e khublei u ya waroh ar ki sorkar, ka Synjuk Waheh Chnong, ka Hills Farmers Union, ki jan chnong wa kiwi ki seiñbhalang wa da yoh u ah ya u kba ha kani ka kynti.
Da pynrap u Deimonmi deiwa ong wa manda dep ah ya u kba, ki paidbah ka chnong diaw mynsien ki neibhah boi daw chah pyndik biang heipor wow rep wow thung ha u snem wow wan.
Kamtæ da kyrpaad u ya ka sorkar jylla wow chim i bahkhlieh wow pynbait ya u pood khnang wa u chngaaiñ ki neipor cheipor.
Da e khublei u leh ya ki seiñbhalang na Karbi Anglong leh kamjooh wa da yoh ki wow ah ya u kba haodooh kattæ.
Discussion about this post