U Montri ka chnat i chait i khiah, u Wailadmiki Shylla, ha ka 20 tarik uni u bnai da saam u ya ki tiar wa emkaam cha ki thaw e sumaar waphær waphær ha West Jaiñtia Hills District wa kynthup cha ki Sub Centre, PHC, CHC wa Civil Hospital, heijooh i por da saam haroh u ya ki tiar wa emkaam cha ki Anganwadi Centre ka District kiwa yatoh neibynta u pait bniah yei heh i san ki khynnah wa kamjooh ki tiar kyndeh-ke, ki tiar e sikai ya ki khynnah yow pynproh yei bor jabieñ.
Ya kini ki tiar da thied dei kyrchaan poisa ka Power Finance Corporation Ltd. lyngba ka Corporate Social Responsibility (CSR) kamwa Rs. 5.8 klur hadien i chimkhia u DC ka West Jaiñtia Hills, u Abhinav Kumar Singh deilang u Montri i chait i khiah uwa man leh u MLA ka Jowai Constituency.
Ha ka yalang saam ya kini ki tiar wa da pynman ha District Library Auditorium, Mynthong Jowai wa pynlai da ka E.Ch Momin, MCS Assistant Commissioner, WJH, da emlang u Deputy Commissioner, u Abhinav Kumar Singh, ka DM&HO, WJH, ka Dr. P. Shylla, ka Darinylla Iakai, Child Development Project Officer, Thadlaskeiñ ICDS Project, kiwa kreh yong ka chnat i chait i khiah nadooh ki Doctor, ki Asha, kiwa kreh Anganwadi wa kiwi.
U Wailadmiki Shylla hawa klam pynsñiaw u i kmen wa da yoh u thied ya kini ki tiar neibynta u e cha ki thaw e sumaar wa rap emkaam bha ha ki thaw waphær ka District, deiwa yaroh leh ya u DC uwa da chimkhia wei yakrehlang hei wow pynyoh ya ka poisa neibynta u thied ya ki tiar.
Heiyatoh wa ki tiar wa e cha ki Anganwadi leh ong u toh kiwa emkaam bha kamwa kini ki Centre toh kiwa pait yei chait i khiah ki khonboo nadooh i por wa pun hadooh wa kha khnang yow pyntikna wow man ki kiwa chait wa khiah. Kamtæ ki tiar wa e cha ki Anganwadi toh neibynta u thaw yei ku i heh ki khynnah wa lada biang hi ki katkam wa toh u heh u san ki.
Neitæ ki tiar lehke cha ki Anganwadi Centre leh ong u toh kiwa emkaam bha kamwa kini ki Centre toh kiwa pait yei chait i khiah ki khonboo nadooh wa pun hadooh wa kha khnang yow pyntikna wow man ki kiwa chait wa khiah ha waroh ki liang nadooh i doh i pran, i bor pyrkhat wei bor sñiaw (Emotions).
Kamtæ khut u i ya krehlang wei kyntu u leh wow pynemkaam hok ya kini ki tiar neibynta i myntoi ki paidbah wa chong chnong.
Neibynta kiwa kreh Anganwadi ong u ya ki wow man kiwa yaichah kamwa dang em i yakhih i dawa wa sahteiñ yong ki, heiwa neiliang yong oo leh ym em u mylliñ u.
Da pynrap u deiwa ong hawa kreh yei kaam wa bha, i eh i khoo leh ym dam u mih, wei ha iwon iwon i kaam ymtoh iwa suk u pynbait du chisien.
Kamtæ neiliang ka sorkar katwa ye da pyrchang ko u leh wei pyntikna u leh wow booddien yei eh yong ki wei katwa ye wa lah u pyrchang u wow pynbait.
Discussion about this post