March 16, 2022

Yoh kreh du ki baar jylla ha ka CAU: HM Shangpliang

U MLA ka All India Trinamool Congress (AITC) na Mawsynram, u HM Shangpliang da sñiawkhia u hajrong i thung kreh ha ka Central Agriculture University (CAU) heiwa da ong u wa da thung da ki baar jylla wei da kylli u wa lada ka sorkar tip ko ya ini wei lada tip ko leh wa ki bru na ka jylla ym yoh myntoi ha i kaam ha katai ka thaw puræ.

U Shangpliang da pynsñiaw u yeini hawa kylli ynne ka sngi hapoh ka yung dorbar chna aiñ. Hajrong ini, u Montri wa pait ya ki kaam rep hapoh ka jylla, u Banteidor Lyngdoh da pyntip u wa da yaklam ya ini heiwa u Montri Rangbah won da ong u wa ya ka CAU kawa em ha Ri-Bhoi District da pait da ka University kawa na Imphal.

Chwa ini, u Banteidor da pyntip u wa ka sorkar jylla dang booddien ko wa ka sorkar India hawa yatoh wa i chna ya ka Central Agricultural University ha Kyrdem Kulai, Ri-Bhoi District, deiwa pynrap wa kani ka phang dang em ko wei dang im ko yow pynmankaam. U Banteidor da pyntip u yeini hawa jubab yeiwa kylli da u MLA ka KHNAM na North Shillong, u Adelbert Nongrum.

Hawa jubab yei kylli pynrap na u MLA ka Mawsynram, u Montri da pyntip u wa ka Ministry of Agriculture yong ka sorkar India dang bichaar bniah ko ya ini i kaam. Hajrong ini i jubab, u Shangpliang da pynsñiaw u yei wym hun neibhah wa u Montri ym ye u wow pynche hadooh katwon ini i kaam wow booh ya ka CAU dang im namo ym em de.

Yoh kreh du ki baar jylla ha ka CAU: HM Shangpliang

You May Also Like