Kam chibynta i kynmoo burom ya ka World Physiotherapy Day kawa haap ha ka 8 tarik uni u bnai, neiliang ka chnat pure Bachelor of Physiotherapy yong ka North East Adventist University, Khliehtyrchi West Jaiñtia Hills District won da leh burom ko ha ka 9 tarik deiwa pynman ka yakob chna Poster, i pynyoo nongmuna kammon u leh hawa chitom kjut tympong wa da chimbynta lang ki khynnah wa puræ ha waroh ki Semester kani ka chnat, neitæ won da lai ki cha chnong Jaraiñ kawa haap hapoh ka Amlarem Civil Sub-Division wow e sikai wa i sumaar mynkna cha ki paidbah wa chong chnong.
Ka phang yong ka World Physiotherapy Day ha uni u snem toh kawa ong “Low Back Pain and Physiotherapy Management and Treatment”, kawa klam hajrong ki bynta wa kongsan ka Physiotherapy neibhah kani da man ko ka jait chitom wa maad bha ki bru ha kylleiñ ka pyrthai iwa ye u toh na ki dohksah, ki chyeiñ, ki thaw yabi ki chyieñ wa kiwi.
I kynmoo burom ya kani ka sngi da sdang dang step nadooh 8:30 ha North East Adventist University, Khliehtyrchi heiwa lyngba ka yakob chna Poster, ki khynnah da pynyoo ki yei sñiawthooh yong ki heiyatoh ki daw wa wanrah yei chitom kjut tympong wei kammon u sumaar kamjooh leh ki bynta wa khroo ka Physiotherapy.
Ha kani ka yakob da jop ka Pratibha Dhanwar, ka Rideimaya Suchiang, ka Shimtilang Ryntathiang wa u Ebeneser S. Liam.
Neitæ ka Dr. Junita Kyndait, Head of Department Physiotherapy hawa e yei klam da pynsñiawthooh ko hajrong ka World Physiotherapy Day wei da batai ko leh heiyatoh wa i chitom kjut tympong wa da maad lang ha kylleiñ ka pyrthai, da khana ko leh ya ki daw wa yoh yeini i chitom wei kammon ka Physiotherapy yarap ko wow e yada næ sumaar.
Da em leh i pynyoo nongmuna hajrong kammon u leh yow lait nei chitom kjut tympong, kamjooh leh i chaad wa man ki khynja Exercise iwa yarap wow pynjem yei kjut tympong wa da chimbynta da ki khynnah puræ hei yahkhmat ka Dr. Clarity Marwein (PT), Assistant Professor NEAU.
Hadien wa kut ka leh burom ha North East Adventist University, da lai won ki cha chnong Jaraiñ kawa haap hapoh ka Amlarem Civil Sub-Division, West Jaiñtia Hills District wow pynman ya ka Free Physiotherapy Health Camp neibynta kiwa chong chnong.
Ha kani ka Health Camp da em hadooh kamwa 58 ngut kiwa da yoh yei pynche kamjooh i sumaar.
Lyngba kani ka Health Camp neiliang ka NEAU da yooluti ko wa daw ye chooh u pteiñ i lai e chakri heiyatoh waka Physiotherapy cha ki chnong wa em cha khappood.
Discussion about this post