Ki chnat sorkar wa boon da ya krehlang ki yow pynman ya ka Free Mega Health Camp ha Thadlaskein Block ka West Jaiñtia Hills, heiwa ha kani ka jooh ka sngi da pynman leh ya ki Test wei da sumaar leh ya kiwa boon ki jait kjut heiwa da yoh myntoi kiwa boon ki paidbah deilang wa i ya syllok, i pynsñiawthooh wei da yahluti kammon u pteiñ ki wow yoh yei sumaar.
Ya kani ka Free Mega Health Camp da pynman da ka North East Adventist University, Khliehtyrchi, Thadlaskein Block ha ka 10 tarik uni u bnai wei da man ko leh kawa nyngkong kam kani kawa da pynemkaam da ki tiar ki tar kiwa katkam ka juk wa katni yow tip tikna yei jait kjut deiwa pynemkaam da ki stat RT-PCR Technology kiwa ye u e Result hapoh ar kynta deiwa ya krehlang wa ki Scheme sumaar wa da pynkrehkaam da ka sorkar.
Ha kani ka sngi da emlang ka DV Lyngdoh, Additional Municipal Commissioner ka West Jaintia Hills District, ka Dr. Helen J Uriah, District Maternal and Child Health Officer, Health Department, West Jaiñtia Hills District, u Dr. Brightstar Langbang, Block Development Officer, Thadlaskein, u Shiva Sriram, Vice President ka Molbio Diagnostics waka Dr. Darivianca E Laloo, General Manager ka Molbio Diagnostics kawa da e leh yei ktien wai phang.
Ka Dr. Uriah da ong ko wa ka Thadlaskein Block toh kawa duna bha i yoh sumaar ki bru neidaw wa em kiwa sah cha ki thaw cha jngai na ki thaw sumaar. Da ong ko leh wa kani ka Block toh kawa duna bha kiwa yoh tika wei kiwa boon hi ki khynnah kiwa em 2-5 snem i rta ym pu em yoh ki ya ka tika pyrchah ya ka kjut Measles Rubella.
U Shiva Sriram, Vice President ka Molbio Diagnostics kawa chna ya ki kor Truenat, kiwa man kam kiwa da da tipmit leh da ka WHO wow pynemkaam yow leh ya ka RT-PCR Molecular Test hapoh pyrthai, da ong u wa kini ki kor wa ye u pynemkaam da ki Battery wei kiwa khian daw suk wow rah ki cha ki thaw wa em cha jngai.
Da ong u wa kini ki kor ye ki wow leh kiwa boon ki jait Test wei da chna leh ya ki kor ECG wa ye u rah ha kti kamjooh ki kor X-Ray wa krehkaam da ki Battery wei em leh ki kor wa ye u chem ya kiwa yoh Breast Cancer wa kiwi kiwi de.
Ya ki paidbah wa da wan cha kani ka Health Camp da pait ya ki da ki Doctor wa boon kiwa man kam ki Specialist ha ka Obstetrics & Gynaecology, Paediatrics, Medicine, ENT wa kiwi de kiwa pait leh ya kiwa ye u yoh kjut Tuberculosis (TB), Cervical Cancer, Breast cancer, Malaria, Dengue, Chikungunya, HIV, Influenza, Respiratory Disease, Scrub Typhus wa kiwi de.
Ha kani ka sngi da em ka Integrated Counselling and Testing Centre (ICTC) kawa Test ya kiwa ye u em HIV wa Syphilis wei da yoh leh ki leh yei pynsñiawthooh ya u khñiang HIV wa i yarap wa ye ki wow yoh wa da e da ka sorkar.
Da pynsñiawthooh leh chaphang ka e tika wa da pynman hapoh ka Intensified Mission Indhradhanush (IMI 5.0) nibynta ki khynnah, ka kjut TB wa kiwi kiwi de.
Discussion about this post