U Director of School Education & Literacy ka chnat puræ puthi ka sorkar jylla da phah u da ka Show Cause Notice cha ka Principal ka Government Girls’ Higher Secondary School, Jowai neidaw wa ha ka sngi lehkmen ya ka Teachers’ Day da e laad ya ki khynnah wow tem da i sur yalap Election ka Party wa em hapoh ka jylla Meghalaya.
Ini da jia i ha ka lehkmen wa da pynman hapoh ka skur hi ini wa dep heiwa neiliang u Swapnil Tembe, kam u Director da phah pynche u neiyi i daw wym toh u pynchitom ya ka Principal yeini i leh khaler ko wow chah u tem da i sur yalap Election hapoh ka skur neibhah ini man i pyrchah ya ki kyndon pynlai ya ki skur heiwa hapoh ki skur ymtoh u pynman kam ka rynsan wow yalap Election.
I sur yalap Election wa da tem toh yong ka VPP wa ka-it bha khamtam kiwa dang khynroo khyllood wow pynemkaam yow ya chaad da ki kyntien ‘Kongdeng kongnah ha u Prah’ iwa da poor bha ha ki rynsan Social Media ha ki por Election MLA ha uni u snem.
Ye u man wa kiwa boon da mylliñ ki wa ini toh i sur yalap Election wei da tem yeini i sur leh heipor wa lehkmen leh sñiawbha ki bru katni nadooh ki por lai baam doh hadooh ki por wa em kiwa bia.
Discussion about this post