Shillong: U Montri Rangbah ka jylla, u Conrad K Sangma da pyntip u wa ka sorkar jylla da yoh ko du T. 20 Lak na ka North Eastern Council (NEC) ha u snem 2018-19 neibynta le tylli ki project. Da pyntip u wa neibynta 2 tylli ki kaam da yoh ya ka poisa T.10 Lak kawi katwa ya kawi won ympu em yoh poisa.
Hawa jubab yeiwa kylli u MLA ka Congress na Nongpoh, u Mayralborn Syiem, u Conrad da ong u wa ki project wa da mang lyngba ka NEC kynthup ki ya ka Boy’s & Girl’s Hostel ka NEIMA’s Orphanage ha Lad Mynrieng, Pynursla, East Khasi Hills, hei lut wa kamwa T.1.94 Lak. I kreh wa-ar toh neibynta wow chna ya ka yung thymme yong ka thaw puræ Master Education ha St. Mary’s College Teacher Education, Shillong, heiwa i lut da kynjoh i T.334.18 Lak, deiwa pynrap wa ka project kawa le toh neibynta wow chna ya ka sarok wa 40 km kawa pynyabi ya ka Rymbai-Bataw-Borsora-Jalaphur kawa da booh wow lut T. 94.19 Lak.
Hawa jubab chooh chooh yeiwa da kylli, u Conrad da ong u, ha u snem 2018-19 ka sorkar jylla da pdiang ko T.38 Klur na ka NEC, wei na kani T.35 klur toh neibynta ki project yong ki snem wa da dep.
U Montri Rangbah da pyntip u leh wa ya ki 24 tylli ki scheme wa da mynjur wow pynlut tyngka lyngba ka NEC ha u snem 2017-18 dadep wow pynlait ya ka poisa wei ka kaam da lai bait ko khlem sangeh.
U Conrad da ong u leh wa i yoh ya ki scheme na ka NEC yaphær ki na uwi u snem cha uwi won, deiwa ong wa ha ki san snem wa dadep, T. 53 klur da yoh ha u snem 2013-14, T. 59 klur ha u snem 2014-15, T.73 klur ha u snem 2015-16, T. 41 klur ha u snem 2016-17 wei ha u snem 2017-18 da yoh T.87 klur.
Discussion about this post