U Montri wa pait ya ka Kaam Pohyung hapoh ka jylla, u Lahkmen Rymbui da pyntip u wa ka sorkar da yoh pdiang ko ya ka chithi na ka Hynniewtrep National Liberation Council (HNLC) kawa pynsñiaw wa smat ko wow wan yaklam yasuk noh khlem da booh kyndon.
Katkam wa pyntip u Lahkmen, ya ka chithi da phah cha u Montri Rangbah, u Conrad K Sangma, cha u Symbood Montri Rangbah, u Prestone Tynsong wa cha oo kam u Montri Kaam Pohyung.
Da khana u leh wa kamwa da ong u Montri Rangbah, ka sorkar dang yang ko wow yoh da ka chithi naka HNLC wei kattu wa da yoh ya kani ka chithi daw pyntip leh cha ka sorkar India. Wei neiliang ka sorkar leh da sdang ko wow jied ya ki ksiang.
U Lahkmen da yooluti u wa daw ye wow pynlai smat ya ini i kaam neibynta i suk i saaiñ hapoh ka jylla.
