Jowai: Ka BJP ka West Jaiñtia Hills ynne ka sngi da yoh president thymme ko da u Marki Mulieh u MDC ka Jowai North wei da wan psiah leh 77 ngut kam ki dkhot thymme ka BJP.
Ya ka yalang wa pynman ha yung u MDC ha Ladthadlaboh da emlang leh u State President ka BJP u Shibun Lyngdoh wa u President ka East Jaiñtia Hills u Herlington Shadap.
U Herlington da ong wa nachwa heipor wym pu em u man u kam u dkhot ki seiñ saiñ pyrthai da man u du kam uwa thap vote donhi wei hadien wa kut ka election leh kut wot i emkti ha ki kaam padibah, tangwa deiwa yasoh lang wa ki seiñ saiñ pyrthai pteiñ i kreh yow wanrah i roi i paar cha ki paidbah.
U Shibun Lyngdoh da ong u waka BJP ym toh ka Party niam Hindu wei kini waroh toh ki khubor hamsaya wa pynhær ki bru yow pynsihnaam ya ka Party. Yow pynsakhiat yeini da emlang leh ha kani ka yalang u Golam Mostafa u President ka BJP Morcha Meghalaya Pradesh u Muslim wei kam u President oo pait u ya ki khian paaid hapoh ka jylla Meghalaya.
Ha kani ka sngi leh da em u Jagdamba Mall u Organisation Secretary ka Meghalaya uwa khana cha ki paidbah yei rukom krehkaam ka BJP.
Discussion about this post